Walo ka benepisyaryo ang nakadawat og hog raising livelihood package ubos sa Individual Livelihood Program sa Department of Labor and Employment (DOLE) atol sa turnover activity nga gihimo niadtong Hunyo 1, 2026 sa Municipal Covered Court, Barangay Sta. Cruz, San Jose, Dinagat Islands.

Ang maong kalihokan gipangunahan ni Municipal Mayor Ruben J. “Kking” D. Zuniega ug PESO Manager Designate Myrlinda Navarrete isip kabahin sa paningkamot sa lokal nga panggamhanan, sa pakigtambayayong sa DOLE, sa paghatag og dugang oportunidad sa panginabuhian alang sa mga lumulupyo.

Ang matag benepisyaryo nakadawat og usa (1) ka sako nga Hog Starter Pellets, upat (4) ka sako nga Hog Grower Pellets, lima (5) ka sako nga Hog Finisher Feeds, unom (6) ka sako nga Hog Gestating Feeds, usa (1) ka botelya sa Hog Multi-Vitamins ug B-Complex, ug usa (1) ka kilo nga Amino Acid + Electrolytes + Probiotics Multi-Vitamins.

Pinaagi sa maong programa, gitinguha nga mapalig-on ang panginabuhian sa mga benepisyaryo pinaagi sa paghatag og suporta sa livestock production, nga makatampo usab sa pagpalambo sa lokal nga produksyon sa kahayopan sa lungsod sa San Jose.