‎Gipahigayon sa Department of Social Welfare and Development (DSWD) ang usa ka Community Assembly alang sa validation sa mga potensyal nga benepisyaryo sa ika-14 nga set sa Pantawid Pamilyang Pilipino Program (4Ps) karong adlawa, Abril 8, 2026, sa Municipal Covered Court sa Barangay Sta. Cruz, San Jose, Dinagat Islands.

‎Ang maong kalihokan kabahin sa padayon nga proseso sa pag-validate sa mga pamilya nga posibleng maapil sa 4Ps, aron masiguro nga ang mga kwalipikado lamang ang mahimong benepisyaryo sa programa.

‎Ang Pantawid Pamilyang Pilipino Program (4Ps) usa ka national government conditional cash transfer program nga nagtumong sa pagtabang sa mga kabus nga pamilya pinaagi sa pinansyal nga ayuda alang sa panglawas, edukasyon, ug nutrisyon sa mga bata, kapalit sa pagtuman sa pipila ka kondisyon sama sa regular nga pag-eskwela sa mga bata, pagpa-check up sa health center, ug pag-apil sa mga Family Development Sessions (FDS).

‎Mitambong sa kalihokan ang mga kawani sa DSWD nga gipangunahan ni Ma’am Ireen S. Relabo-Nacawili, RSW, Provincial Link sa DSWD, uban sa kooperasyon sa lokal nga panggamhanan ug mga opisyal sa barangay aron maseguro ang hapsay ug organisado nga pagpatuman sa validation process.

Pinaagi niini nga proseso sa validation ug pag-check sa mga dokumento, masiguro nga ang tabang sa gobyerno mahatag lamang sa mga pamilyang kwalipikado ug nanginahanglan. Tumong usab niini nga mapalambo ang kaayohan sa mga bata ug pamilya ug makatabang sa pagpakunhod sa kakabos sa komunidad.

‎