Malamposong gipahigayon sa Lokal nga Panggamhanan sa San Jose, pinaagi sa Office of the Municipal Agriculturist (MAO), sa pakigtambayayong sa Bureau of Fisheries and Aquatic Resources (BFAR), ang Turnover and Distribution of Hook and Line Fishing Gear niadtong Hunyo 25, 2026 sa Municipal Covered Court, Barangay Sta. Cruz, San Jose, Dinagat Islands.

Ang turnover ceremony gipangulohan ni Provincial Fishery Officer Bernard Baclayo sa BFAR, uban ni Municipal Agriculturist Jo Ann M. Gonzales, ug gisuportahan ni Mayor Ruben J D. Zuniega. Kabahin kini sa padayon nga paningkamot sa pagpalig-on sa panginabuhian sa mga lokal nga mangingisda ug sa pagpauswag sa sektor sa panagat sa lungsod.

Mokabat sa 44 ka mga mangingisda gikan sa mga barangay sa Jacquez, Sta. Cruz, Aurelio, Poblacion, Wilson, ug Don Ruben ang nakadawat sa mga kagamitan sa panagat, nga naglakip sa:

• 15 ka benepisyaryo alang sa Palangre

• 25 ka benepisyaryo alang sa Tapsay

• 2 ka benepisyaryo alang sa Palaran

• 2 ka benepisyaryo alang sa Taan

Pinaagi niini, gilauman nga mas mapalig-on ang ilang panginabuhian ug mas mapalambo ang ilang kapasidad sa pagpadayon sa lig-on ug produktibong pangisda, nga makatampo usab sa padayon nga kalamboan sa sektor sa panagat sa Munisipyo sa San Jose.