SAN JOSE, Dinagat Islands — Gipahigayon ang Tulong Panghanapbuhay sa Ating Disadvantaged/Displaced Workers (TUPAD) Orientation alang sa 1,112 ka benepisyaryo gikan sa 12 ka barangay sa lungsod niadtong Marso 18, 2026 sa Municipal Gymnasium sa Brgy. Don Ruben.
Ang kalihokan nagtumong sa pagpasabot sa mga giya sa TUPAD, kahimtang sa trabaho, ug mga angay sundon aron masiguro ang kaayohan, kaluwasan, ug hapsay nga pagpatuman sa programa alang sa mga partisipante.
Ang maong aktibidad gipangunahan sa Department of Labor and Employment (DOLE) ubos sa liderato nila Engr. John Ritche Tangpos, Supervising LEO/DOLE FO Head, ug Merlie A. Bantayanon, Senior LEO/TUPAD Focal Person, kauban ang Public Employment Service Office (PESO) nga gipangulohan ni PESO Manager Myrlinda Navarrete.
Sa maong orientation, gipresentar sa mga resource speakers ang nagkadaiyang topiko lakip ang TUPAD Guidelines ni TUPAD Coordinator Janeces T. Ragay ug Occupational Safety and Health (OSH) ni TUPAD Coordinator Julius Paulo G. Malata, diin gipasiugda ang hustong pagtrabaho ug ang paglikay sa posibleng peligro sa trabahoan.
Pinaagi niini, nadugangan ang kahibalo sa 1,112 ka mga benepisyaryo kabahin sa programa ug sa ilang mga katungod isip mga partisipante, nga makatabang sa mas episyente ug luwas nga implementasyon sa proyekto.
Padayon ang LGU San Jose ug DOLE sa pagpalig-on sa mga programa nga naghatag og panginabuhian ug dugang oportunidad alang sa katawhan, isip kabahin sa ilang padayon nga serbisyo alang sa kalamboan sa komunidad.