Malampusong gipahigayon ang Special Program for Employment of Students (SPES) Orientation niadtong Mayo 5, 2026 sa Municipal Covered Court sa Munisipyo sa San Jose, nga gipangunahan sa Public Employment Service Office (PESO) ubos sa pagdumala ni PESO Manager-Designate Myrlinda J. Navarrete.

Ang SPES usa ka programa sa Department of Labor and Employment (DOLE) nga naghatag og temporaryong trabaho sa mga estudyante aron matabangan sila sa ilang gastusin sa eskwela samtang makakuha usab og aktuwal nga kasinatian sa trabaho.

Sa maong orientation, gipatin-aw ang mga importanteng detalye sa programa, lakip ang kahulugan sa SPES, mga kinahanglanong dokumento, proseso sa pagdawat sa sweldo, mga responsibilidad sa mga benepisyaryo, ug iskedyul sa pagtrabaho. Gipahibalo usab nga ang mga partisipante magtrabaho sulod sa 20 ka adlaw ug makadawat og adlawang sweldo nga mokabat sa ₱479.

Gipresentar usab ang pagkabahin sa mga benepisyaryo base sa pundo: 50 ka slots nga ginapundohan sa 50% DOLE ug 50% LGU (shared funding), 16 ka slots nga 100% ginapundohan sa LGU, ug 20 ka slots alang sa mga benepisyaryong high school nga ginapundohan pinaagi sa Provincial PESO.

Aktibong mitambong sa maong kalihukan si DOLE Supervising LEO Engr. John Ritchie A. Tangpos, PESO Manager-Designate Myrlinda J. Navarrete, mga kawani sa PESO, ug ang mga benepisyaryo sa SPES.

Sa iyang mensahe, gipasiugda ni Engr. Tangpos nga ang SPES usa ka mahinungdanong oportunidad alang sa kabatan-onan aron makabaton og praktikal nga kasinatian sa trabaho. Iyang gihulagway kini isip “window of opportunity” nga makatabang sa mga estudyante sa pagdiskobre sa ilang interes ug posibleng career path sa umaabot. Gidasig usab niya ang mga partisipante sa pagpahimulos sa kahigayonan ug pagpakita og dedikasyon sa ilang mga buluhaton.

Pinaagi sa maong programa, padayon nga gipalig-on ang kabatan-onan pinaagi sa paghatag og oportunidad nga makatabang dili lamang sa ilang pinansyal nga panginahanglan kondili maghatag usab og lig-on nga pundasyon alang sa ilang umaabot nga career ug propesyonal nga kalamboan.