SAN JOSE, Dinagat Islands — Nagmalampuson ang selebrasyon sa Grandparents Week 2026 nga gipahigayon sa Municipal Beach sa Sta. Cruz niadtong Marso 18, 2026, diin aktibong mipartisipar ang mga senior citizens sa lungsod ubos sa temang “Remembering the Old Ways, Inspiring the New Generation.”

Gisugdan ang kalihokan pinaagi sa welcome address ni Mrs. Leonarda M. Peña, nga nag-awhag sa mga partisipante nga magpabiling aktibo ug magmalipayon sa maong selebrasyon isip pagpasidungog sa ilang bililhon nga papel sa komunidad.

Napuno sa kalingawan ug kahinam ang maong okasyon samtang gipakita sa mga senior citizens ang ilang talento sa traditional cooking, pagpasundayag sa indigenous attire, ingon man sa sayaw ug mga awit nga nagpakita sa ilang kultura ug kasinatian.

Dugang pa, nalingaw usab ang tanan sa nagkadaiyang traditional games nga giandam, nga nakahatag og kahigayunan sa panaghiusa ug pagbalik sa mga karaang pamaagi nga nakapahimo sa ilang henerasyon nga lig-on ug malipayon.

Gipangulohan sa Office of the Senior Citizens Affairs (OSCA) ang maong kalihokan ubos sa pagpangulo ni OSCA Head Florentina G.Sarita. Mitambong usab ang mga senior citizens sa lain-laing barangay uban sa presensya sa mga lokal nga opisyal lakip si Mayor Kking Zuniega, Vice Mayor Rechard T. Pasquil, Sangguniang Bayan Members Clica Antipolo ug Toto Portullano, ingon man ang mga barangay officials.

Sa iyang mensahe, gipasiugda ni Vice Mayor Pasquil ang kahinungdanon sa pag-atiman sa kahimsog ug kaayohan sa mga senior citizens isip pundasyon sa lig-on nga komunidad. “Magpabilin nga lig-on ang mga senior citizen para sa lig-on nga San Jose,” matud pa niya.

Ang maong kalihokan nagpadayag sa dakong pagrespeto ug pagpasidungog sa kontribusyon sa mga tigulang, samtang naghatag usab og inspirasyon sa bag-ong henerasyon nga padayon nga ipadayon ang maayong pamatasan ug tradisyon.