Nagpalig-on sa ilang pagpangandam ang lokal nga panggamhanan sa San Jose alang sa umaabot nga Semana Santa pinaagi sa pagpahigayon og usa ka coordination meeting niadtong Marso 30, 2026 sa opisina sa Municipal Disaster Risk Reduction and Management Office (MDRRMO).

Gitumong sa maong miting ang paglatid sa komprehensibong safety plan aron masiguro ang kaluwasan ug kahapsay sa selebrasyon. Lakip sa gihisgutan ang epektibong deployment sa mga personnel, pag-ila sa mga strategic chokepoints, ug pagbutang og first aid stations sa nagkalain-laing lugar sa lungsod.

Gipalig-on usab ang communication protocols ug emergency reporting system aron mas mapaspas ang responde sa mga otoridad sa bisan unsang insidente nga mahimong mahitabo atol sa Semana Santa.

Mitambong sa maong tigum ang mga representante gikan sa nagkalain-laing ahensya ug opisina sa LGU, nga nagpakita sa lig-on nga koordinasyon ug kooperasyon sa gobyerno sa lokal nga lebel.

Padayon sa pagpangandam ang lokal nga panggamhanan aron masiguro ang malinawon, organisado, ug luwas nga pag-obserbar sa Semana Santa alang sa tanang residente ug bisita.