Nagpadayag og dako nga garbo ang probinsya sa Dinagat Islands human makab-ot sa usa ka batan-ong estudyante ang kahimayaan sa international nga kompetisyon sa siyensya. Nakadaog og Gold Medal ang Grade 12 student nga si Glaizel Mae S. Morados sa International Science Olympiad Competition of Southeast Asia (ISOCSEA) nga gipahigayon sa Osaka, Japan niadtong Disyembre 19, 2025.

Si Morados usa ka masinabtanon ug kugihan nga estudyante sa Don Ruben E. Ecleo Sr. Memorial National High School sa San Jose, Dinagat Islands. Sa iyang pag-apil sa maong kompetisyon, iyang gipakita ang talagsaong kahibalo ug abilidad sa lain-laing larangan sa siyensya, lakip na ang Biology, Chemistry, Physics, ug Earth and Environmental Sciences.

Dako usab ang papel sa iyang coach nga si John Kenneth Villareal, kinsa mitabang sa paghulma sa iyang talento ug naggiya kaniya sa matag hagit nga iyang giatubang atol sa kompetisyon.

Ang ISOCSEA usa ka prestihiyosong international science competition alang sa elementarya ug sekondarya nga mga estudyante sa tibuok Southeast Asia.

Tumong niini ang pagpalambo sa kahusayan sa siyensya ug paghatag og higayon sa mga batan-on nga mapakita ang ilang talento sa global nga entablado, samtang nagpalig-on usab sa ilang kritikal nga panghunahuna ug abilidad sa pagsulbad sa mga komplikadong problema.

Dili lamang kini personal nga kadaugan ni Morados, kondili usa usab ka dakong dungog alang sa lungsod sa San Jose ug sa tibuok Dinagat Islands, ang iyang nakab-ot naghatag inspirasyon sa ubang kabatan-onan nga magpadayon sa pagpaningkamot ug mosalig sa ilang kaugalingong abilidad bisan pa sa kalisod.

Ang kalampusan ni Morados nagpamatuod nga ang talento sa mga kabatan-onan sa probinsya dili gayud mapugngan sa limitasyon sa lugar o kahimtang.

Sa husto nga suporta, giya, ug paningkamot, sila makahimo sa paglambo ug pagpasidlak sa ilang ngalan sa international nga lebel.

Gilauman nga mas daghan pa siyang maabot nga kalampusan ug mahimong ehemplo sa sunod nga henerasyon sa mga estudyante.

Congratulations, Glaizel! Padayon sa paglambo ug paghatag inspirasyon sa kabatan-onan! 🌟