Usa ka innovator nga si Gibsonjis Brigole Rosales, nagpuyo sa P-1 San Juan, San Jose, Dinagat Islands, nakadawat og global nga pag-ila tungod sa iyang imbensyon nga Channel Multiplier Remote Control System (CMRCS), usa ka teknolohiya nga makahimo sa centralized control sa kapin sa usa ka libo ka appliances gamit ang usa lang ka wireless transmitter o smartphone.

Ang iyang kalampusan gipadayag sa lain-laing inisyatibo sa Department of Science and Technology – Technology Application and Promotion Institute (DOST-TAPI) ug uban pang international intellectual property programs.

Ang CMRCS gidisenyo aron mapadali ang pagdumala sa mga gamit sa balay ug industriya sama sa suga, electric fan, refrigerator, ug aircon.

Nagsugod kini gikan sa yano nga hilig ni Rosales sa pag-eksperimento sa iyang pagkabata sa Dinagat Islands, nga hinay-hinay nga nahimo’g usa ka advanced nga sistema sa teknolohiya.

Sumala pa niya, giila niya ang dakong tabang sa DOST-TAPI, TechMatch, ug ubang IP programs sama sa World Intellectual Property Organization (WIPO) ug United States Patent and Trademark Office (USPTO) sa pagprotektar sa iyang imbensyon.

Gipublikar ang patent ni Rosales niadtong Enero 1, 2026 sa United States Patent and Trademark Office (USPTO) ug naghulat na lang sa final approval, samtang giila usab siya isip “Innovation Champion” sa Grants and Assistance to Leverage Innovations for National Growth (GALING) Program sa DOST-TAPI niadtong Oktubre 2, 2023.

“Ang sayo nga pagpreserba sa ideya makatabang aron mas mapalambo pa kini ug moabli og daghang oportunidad sa umaabot,” sumala pa niya.

Gilauman nga ang imbensyon maghatag og daghang oportunidad sa teknolohiya ug posibleng commercialization nga makabenepisyo sa industriya ug komunidad.