Malampusong gipahigayon ang ika-44 nga Joint Recognition Program ug Moving Up Ceremony alang sa mga kabataan sa lungsod sa San Jose niadtong Marso 24, 2026, sa Municipal Gymnasium sa Don Ruben, San Jose, Dinagat Islands.

Ang maong selebrasyon naghatag og pasidungog sa mga learners gikan sa nagkadaiyang Child Development Centers (CDC) sa lungsod sa San Jose alang sa Academic Year 2025–2026.

Gisugdan ang programa pinaagi sa processional march nga gitambongan sa mga municipal officials, barangay officials, mga representante sa Municipal Social Welfare and Development Office (MSWDO), Child Development Workers (CDWs) o mga magtutudlo, ingon man ang mga ginikanan ug mga estudyante.

Sa maong seremonya, pormal nga gikumpirma ni Janice F. Romano, RSW, ang mga promoted ug completers. Gisundan kini sa pagtunol sa mga sertipiko isip pag-ila sa ilang kakugi ug dedikasyon sa pag-eskwela.

Sa iyang mensahe, gipadayag ni Vice Mayor Rechard Pasquil ang iyang mainiton nga pagbati sa pag-congratulate sa mga kabataan. Gipasalamatan usab niya ang mga magtutudlo ug ginikanan sa ilang walay hunong nga suporta, sakripisyo, ug pag-amuma sa mga bata.

Ang kalihokan nagpamatuod sa lig-on nga paningkamot ug suporta sa lokal nga kagamhanan sa San Jose sa pagpalambo sa kalidad sa edukasyon ug sa pag-andam sa mas maayong kaugmaon alang sa kabataan.