Gipasidunggan si Mayor Ruben J “KKing” D. Zuniega ug Vice Mayor Rechard T. Pasquil human sila gihatagan og taas nga pagkilala sa ika-10 Saludo Excellence Award for Outstanding Humanitarian and Leadership Community Service nga gipahigayon sa The Manila Hotel, Metro Manila niadtong Abril 12, 2026.

Ang maong award nagtimaan sa ilang padayon nga dedikasyon sa pag-alagad sa katawhan sa San Jose, Dinagat Islands, pinaagi sa mga programa ug inisyatibo nga nagtutok sa kaayohan sa komunidad, inklusibong paglambo, ug maayong pang-gobyerno.

Si Mayor Zuniega gihatagan sa Saludo Excellence Award for Outstanding Humanitarian and Leadership Community Service, samtang si Vice Mayor Pasquil giila usab sa Saludo Excellence Award for Outstanding Humanitarian and Community Service. Ang maong mga pasidungog nagpakita sa ilang aktibong papel isip mga lider nga nagdala og positibong kausaban sa lokal nga pangagamhanan.

Sumala sa mga organizers sa Saludo Excellence Awards, ang seremonya ginahimo kada tuig aron pasidunggan ang mga outstanding leaders gikan salain-laing bahin sa nasud nga nagpakita og integridad, serbisyo publiko, ug tinuod nga pag-atiman sa katawhan. Kini naglangkob sa mga indibidwal nga nagbarog isip ehemplo sa maayo ug responsable nga pagdumala.

Sa ilang acceptance message, gipasiugda nga ang maong kalampusan dili lang personal nga kadaugan, kondili kadaugan sa tibuok lungsod sa San Jose. Ilang giila nga ang award usa ka inspirasyon aron mas mapadayon pa ang pagserbisyo nga adunay kasingkasing, transparency, ug commitment sa katawhan.

Ang maong pasidungog giisip usab nga pamatuod sa lig-on nga partnership sa lokal nga liderato sa pagpatuman sa mga proyekto nga nagpauswag sa kalidad sa kinabuhi sa mga residente, lakip na ang social services, infrastructure development, ug community empowerment programs.

Sa karon, padayon ang lokal nga gobyerno sa San Jose sa ilang misyon nga mapalambo ang serbisyo publiko ug mapalig-on ang pagkahiusa sa katawhan, nga nagsilbing pundasyon sa ilang aduna’y long-term vision alang sa progresibong lungsod.