Gipakusgan sa Lokal nga Panggamhanan sa San Jose ang ilang kampanya batok sa rabies pinaagi sa pagpahigayon sa Municipal Anti-Rabies Council Meeting sa San Jose Farmers Training Center, Barangay Sta. Cruz, San Jose, Dinagat Islands niadtong Pebrero 10, 2026.

Gipangulohan ang miting ni Municipal Agriculturist Jo Ann M. Gonzales uban si Agricultural Technologist Edna B. Roa, diin gi-review ug gihisgutan pag-ayo ang Municipal Ordinance No. 145 Series of 2010. Kini nga ordinansa naglatid sa responsableng pagpanag-iya ug pag-atiman sa mga iro, lakip na ang obligasyon sa mga tag-iya sa pagpabakuna sa ilang mga alagang hayop, pagmonitor sa ilang kahimtang, ug paglikay sa pagpasagdan niini sa gawas nga mahimong hinungdan sa peligro sa komunidad.

Sa laing bahin, gipasiugda ni Provincial Veterinarian Dra. Aimee A. Jimeno ang kahinungdanon sa Anti-Rabies Act of 2007 (RA 9482), nga naglatid sa mga polisiya ug lakang aron mapugngan ang pagkatap sa rabies. Iyang giemphasize nga ang rabies usa ka makamatay nga sakit kon dili dayon matambalan, ug sa kadaghanan sa mga kaso, gikan kini sa kagat sa iro nga wala mabakunahi. Tungod niini, dako kaayo ang papel sa matag indibidwal ug komunidad sa pagpugong sa pagkatap niini pinaagi sa responsableng pag-atiman sa mga hayop.

Gisabutan sa miting nga ang matag barangay adunay klaro ug importante nga responsibilidad sa pagpatuman sa ordinansa. Lakip niini ang pagmonitor sa mga iro nga adunay tag-iya, pagrehistro sa mga alagang hayop, ug ang pagdumala sa mga stray dogs nga walay nag-atiman.

Gihisgutan usab ang mas hugot nga pagpatuman sa mga regulasyon aron masiguro nga ang tanang tag-iya sa iro mosunod sa mga balaod nga gilatid.

Usa sa mga lakang nga giuyonan mao ang pagdakop sa mga stray dogs ug pagbutang niini sa barangay custody sulod sa tulo (3) ka adlaw. Sa maong panahon, hatagan og higayon ang tag-iya sa pag-angkon sa ilang hayop. Apan kon walay moangkon human sa gitakdang panahon, ipatuman ang angay nga aksyon subay sa mga probisyon sa ordinansa ug sa balaod aron maprotektahan ang katawhan gikan sa posibleng peligro.

Dugang pa, gipasiugda sa mga opisyal ang kahinungdanon sa regular nga pagbakuna sa mga iro batok sa rabies, pagbutang og leash o proper enclosure, ug ang paghatag og husto nga pag-atiman sa mga alagang hayop.

Gihangyo usab ang publiko nga magtinabangay sa pagreport sa mga stray dogs ug sa mga insidente sa dog bites aron dayon matubag sa mga otoridad.

Gitambungan ang maong miting sa nagkalain-laing mga opisyal ug stakeholders, lakip si Dr. Neil P. Rosillo, Provincial Health Nurse III Leni Faith A. Samoranos, RHU Anti-Rabies Coordinator Dennis Garing, Municipal Treasury Officer Claro A. Brizo, Committee on Agriculture SB Papias Tuquib, Police Master Sergeant Jestoni Q. Ariston, ug mga kagawad gikan sa nagkalain-laing barangay sa San Jose. Ang ilang presensya nagpakita sa lig-on nga panaghiusa sa tanang sektor sa gobyerno ug komunidad sa pag-atubang sa isyu sa rabies.

Gipahayag usab sa mga partisipante ang ilang suporta sa pagpalig-on sa information drive ug awareness campaign sa matag barangay aron mapahibalo ang katawhan sa kahimtang sa rabies ug sa mga paagi sa paglikay niini.

Gilauman nga pinaagi sa edukasyon ug aktibong partisipasyon sa komunidad, mas mapamenos ang insidente sa rabies ug dog bites sa lungsod.

Ang maong paningkamot usa ka pamatuod sa determinasyon sa LGU San Jose sa pagpanalipod sa kahimsog ug kaluwasan sa katawhan.

Pinaagi sa mas hugot nga implementasyon sa balaod, epektibong koordinasyon, ug kooperasyon sa publiko, gilauman nga makab-ot ang tumong nga usa ka rabies-free nga komunidad sa umaabot.

Sa katapusan, nag-awhag ang LGU sa tanang residente nga mahimong responsable nga tag-iya sa hayop, mosunod sa mga ordinansa, ug magtinabangay aron mapadayon ang kalinaw ug kaluwasan sa ilang palibot.

Ang paglikay sa rabies dili lamang responsibilidad sa gobyerno, kondili usa ka kolektibong buluhaton sa tibuok komunidad.