SAN JOSE, Dinagat Islands — Gipahigayon niadtong Marso 24, 2026 ang First Quarter Meeting sa Project Monitoring Committee (PMC) sa 2nd Floor Training Skills and Assessment Center, nga gipangulohan ni Vice Mayor Rechard T. Pasquil isip Presiding Officer uban sa mga miyembro sa komite.
Tumong sa maong panagtigom ang pag-review sa kasamtangang kahimtang sa mga proyekto sa lungsod, lakip ang ilang progreso ug mga nahimo (accomplishments). Gihatagan usab og pagtagad ang mga updates sa SubayBayan, paghisgot sa nagkalain-laing isyu ug posibleng risgo, ingon man ang pagplano alang sa umaabot nga field inspection.
Ang Project Monitoring Committee gibuo pinaagi sa Executive Order No. RJZ-10-18, series of 2025 nga gipagawas ni Mayor Hon. Ruben J. D. Zuniega, aron masiguro ang husto, lig-on, ug episyenteng pagpatuman sa mga proyekto sa lungsod sa San Jose.
Padayon nga ginabuhat sa PMC ang pag-monitor ug pag-evaluate sa mga proyekto aron maseguro ang epektibong implementasyon niini ug mapadayon ang kalidad sa serbisyo nga ginahatag sa lokal nga panggamhanan alang sa kaayohan sa katawhan.