Aron masiguro ang hapsay ug episyenteng pagpatuman sa proyekto, gipahigayon karong Hunyo 30, 2026, sa Mayor’s Office, Municipal Building, Brgy. Sta. Cruz, San Jose, Dinagat Islands, ang Pre-Construction Conference alang sa pagtukod sa Municipal Executive Building.

Gipangulohan kini ni Mayor Ruben J D. Zuniega ug gitambungan ni Municipal Engineer Alex T. Navarra, DPWH Project Engineer Jade Genova, Engr. Mark Eduard Ebueza, Project Monitoring and Evaluation Assistant Engr. Sany Olpos, ug mga representante sa RL Construction nga gipangulohan ni Project Engineer Fidel Luego.

Atol sa maong panagtigom, gihisgutan ang project overview o scope of works, mga responsibilidad ug obligasyon sa contractor, timeline sa implementasyon, ingon man ang ubang teknikal nga aspeto sa proyekto aron masiguro ang hapsay nga koordinasyon ug tukmang pagpatuman niini.

Ang Municipal Executive Building pagatukoron sa Brgy. Sta. Cruz, San Jose, Dinagat Islands, nga adunay kinatibuk-ang kantidad nga ₱20 milyon ug ipatuman sa RL Construction.

Pinaagi sa maong pre-construction conference, gipalig-on ang koordinasyon tali sa LGU San Jose, sa DPWH, ug sa RL Construction aron masiguro ang hapsay, episyente, ug tukmang implementasyon sa proyekto subay sa giplanong timeline, kalidad, ug mga teknikal nga espesipikasyon niini.