SAN JOSE, Dinagat Islands — Gipahigayon ang Pre-Disaster Risk Assessment (PDRA) Meeting sa Emergency Operations Center sa MDRRMO–San Jose niadtong Marso 10, 2026 isip kabahin sa pagpangandam sa posibleng epekto sa low pressure area nga anaa pa sa gawas sa Philippine Area of Responsibility (PAR).

Ang miting gipangulohan ni Vice Mayor Rechard T. Pasquil isip presiding officer, uban sa partisipasyon sa mga representante gikan sa nagkalain-laing nasyonal nga ahensya ug lokal nga mga departamento sa munisipyo.

Atol sa miting, gihisgutan ang pinakabag-ong kahimtang sa panahon ug ang posibleng epekto niini sa komunidad. Gihimo usab ang pag-ila sa mga peligro nga mahimong atubangon sa matag barangay, ingon man ang pagsusi sa kapasidad sa LGU ug sa mga response agencies sa pag-atubang sa emerhensiya.

Apil sa gihisgutan ang inventory sa mga resources ug kagamitan nga magamit sa panahon sa kalamidad aron masiguro ang dali ug epektibong pagresponde kung adunay emerhensiya.

Gipahimutang usab ang mga konkretong plano ug lakang aron mapalig-on ang kaandam sa lokal nga panggamhanan ug sakomunidad batok sa posibleng epekto sa bagyo ug uban pang kalamidad.

Ang LGU-San Jose nag-awhag sa tanang residente nga magpabilin alerto, magpadayon sa pag-monitor sa opisyal nga mga advisories, ug mosunod sa mga giya sa mga otoridad aron masiguro ang kaluwasan sa tanan.