Malampusong gipahigayon ang Binignit Festival, usa ka selebrasyon sa lungsod nga gipartisiparan sa tanang opisyal sa barangay ug sa komunidad. Ang maong kalihokan gidumala sa Municipal Tourism, Culture and Arts Office (MTCAO) niadtong April 3, 2026, sa dalan paingon sa PBMA Shrine sa San Jose, Dinagat Islands.

Gisugdan ang programa pinaagi sa opening remarks ni SK Federated President Kim Tampon, ug gisundan sa inspirasyonal nga mensahe ni Vice Mayor Rechard T. Pasquil. Iyang gipasiugda ang kahinungdanon sa pagpalig-on sa lokal nga kultura pinaagi sa pagselebrar sa Binignit Festival.

Sa kinatibuk-an, ang kalampusan sa ikaduhang Binignit Festival nagpamatuod nga pinaagi sa panaghiusa ug kooperasyon sa nagkalain-laing sektor, mapadayon ug mapalambo ang Cultural Lenten Celebration sa San Jose. Dugang pa niini, napalig-on usab ang kultural nga identidad sa lungsod ug napalambo ang turismo.

Ang Binignit Festival unang gipaila sa San Jose niadtong Semana Santa 2025 isip usa ka Cultural Lenten Celebration. Sukad niadto, nahimo kini nga simbolo sa panaghiusa sa matag barangay ug usa ka oportunidad alang sa komunidad nga magtinabangay—dili lamang sa pag-andam sa tradisyonal nga pagkaon, kondili usab sa pagpalig-on sa espiritu sa pagkahiusa panahon sa Kwaresma. Pinaagi niini, napadayag ug napasidunggan ang lokal nga culinary heritage ngadto sa mga bisita ug turista.

Si Mayor Ruben J ”Kking” D. Zuniega mipahayag nga ang Binignit Festival padayon nga palig-onon aron mahimong opisyal nga tradisyon ug lig-on nga kaugalian sa katawhan. Iyang giingon, “Magpadayon kita sa paglaum, pagtuo, ug pag-amping sa kanunay.”

Sa kompetisyon, 11 ka barangay ang nagpakita sa ilang husay sa pag-andam sa binignit. Ang Barangay Justiniana maoy nag-una sa unang pwesto, gisundan sa Barangay Mahayahay sa ikaduhang pwesto, ug Barangay Sta. Cruz sa ikatulong pwesto.

Gipadayag usab ang pasidungog sa Sangguniang Kabataan ubos sa pagdumala ni SK Federated President Hon. Kim Valerie Tampon, kauban ang tanang SK chairpersons ug opisyal. Ang ilang aktibong partisipasyon dakong nakatabang sa kalampusan sa kalihokan.

‎Mitambong sa okasyon ang mga opisyal, naa sila Mayor Ruben J “Kking” D. Zuniega, Vice Mayor Rechard T. Pasquil, SB Clica Antipolo, SB Renford Ho, SB Julmore Pesito, ug SB Kim Tampon (SK Federated President), uban sa mga barangay officials ug empleyado sa LGU, ug gitambongan usab sa mga katawhan ug mga turista.

‎