Malampusong gipahigayon ang 1st Quarter Meeting sa Municipal Tourism, Culture, and the Arts Council (MTCAC) niadtong Marso 17, 2026 sa SB Session Hall, Municipal Building, Sta. Cruz, San Jose, Dinagat Islands. Ang maong miting gipangulohan ni MTCAC Co-Chairperson Julie A. Ontulan isip presiding officer.

Gipokus sa miting ang mga prayoridad nga lakang aron mapadayon ang pagpalambo sa turismo ug ang paglig-on sa mga programa sa lungsod. Lakip sa mga gipresentar ang Financial Report sa Bugkosan sa Isla 2025, diin gisaysay ang detalyadong paggamit sa pondo ug ang kahimtang sa kita ug gasto sa maong kalihokan. Gihatagan usab og update ang konseho sa pinakabag-ong fiscal status sa general fund nga gigamit sa nagkalain-laing programa sa lokal nga panggamhanan.

Gihisgutan usab ang nahuman ug umaabot nga mga capacity-building trainings alang sa tourism sector, nga nagtinguha sa pagpalambo sa kalidad sa serbisyo ug kahibalo sa mga stakeholders. Dugang pa niini, gipaila ang mga kalihokan nga ipahigayon sa ikaduhang quarter sa tuig, nga naglaum sa pagdani og dugang turista ug pagpalig-on sa pagpreserba ug promosyon sa lokal nga kultura.

Usa sa mga mahinungdanong agenda ang paghatag og update bahin sa posibleng mga kausaban ug dugang sa Tourism Code sa lungsod aron mas mapaayo ang implementasyon sa mga polisiya ug regulasyon nga may kalabotan sa turismo.

Sa kinatibuk-an, ang miting naghatag og klaro nga direksyon alang sa umaabot nga mga plano ug proyekto sa sektor sa turismo. Gipakita niini ang padayon nga paningkamot sa lokal nga panggamhanan sa pagpauswag sa serbisyo alang sa mga turista ug sa pagpalig-on sa kultura ug ekonomiya sa lungsod.