Gipahigayon ang usa ka mahinungdanong miting sa opisina ni Gobernador Nilo Demerey Jr. kauban si Mayor Ruben J “Kking” D. Zuniega ug mga opisyal sa probinsya ug munisipyo aron hisgutan ang mga prayoridad nga programa ug proyekto sa San Jose, kagahapon, Enero 26, 2026.

Gitutukan sa maong miting ang rebisyon sa Local Revenue Code aron mas mapalig-on ug mapasayon ang sistema sa koleksyon sa buhis sa munisipyo. Tumong niini ang paghatag og mas klaro ug episyenteng pamaagi sa pagdumala sa lokal nga kita.

Gipresentar usab ang plano sa pagtukod sa Bahay Pag-asa Training Center nga maghatag og skills training alang sa kabatan-onan ug sa komunidad, isip kabahin sa pagpalambo sa kapasidad sa mga residente.

Gihisgutan sab ang pag-update sa Climate Disaster Risk Assessment (CDRA) aron masiguro ang mas andam ug organisadong pagtubag sa panahon sa kalamidad.

Lakip pa sa mga hisgutanan ang pagpaayo sa Municipal Public Market, pagpalig-on sa Anti-Drugs Program pinaagi sa Bahay Silangan, pagtukod sa bag-ong Fire Station sa Barangay Luna, ug ang plano nga i-convert ang Municipal Hall ngadto sa People’s Hall aron mas mapaduol ug mapasayon ang serbisyo sa katawhan.

Mitambong sa maong miting sila Provincial Treasurer Jocelyn Albores, Provincial Project Development Officer Jorge Daligdig, MSWDO Joy P. Parajes, RSW, Municipal Treasurer Claro A. Brizo, CDS II/Market Administrator-Designate/MADAC Focal Loejun Patual, Chief of Staff RV Valdevieso, ug BAC Secretariat Donchie Paquibot.

Ang miting nagpakita sa lig-on nga panaghiusa tali sa probinsya ug munisipyo, nga nagtinguha sa mas hapsay nga paghatag serbisyo ug padayon nga kalamboan sa San Jose.