SAN JOSE, DINAGAT ISLANDS — Malampusong gipahigayon sa San Jose ang Linggo ng Kabataan 2026, nga nagtumong sa paghatag og oportunidad sa mga kabatan-onan nga mahimong aktibong partisipante sa nagkadaiyang kalihokan nga nagpalambo sa ilang talento, abilidad, panaghiusa, ug liderato.
Ang selebrasyon gipangunahan sa Local Youth Development Office (LYDO), uban sa Local Youth Development Council (LYDC) ug Pederasyon ng mga Sangguniang Kabataan, sa pakigtambayayong sa mga barangay ug mga youth leaders sa lungsod.
Kabahin sa pagsugod sa maong selebrasyon ang Opening Program nga gipahigayon niadtong Agosto 9, 2026 sa Municipal Gymnasium, Brgy. Don Ruben, San Jose, Dinagat Islands. Gitambongan kini sa mga kabatan-onan ug youth leaders gikan sa nagkadaiyang barangay, uban sa mga opisyal ug mga representante sa lokal nga panggamhanan.
Gisugdan ang programa pinaagi sa Opening Parade, diin gipakita sa mga kabatan-onan ang ilang aktibong partisipasyon ug suporta alang sa selebrasyon. Nahimong oportunidad usab kini aron mapalig-on ang panaghiusa tali sa mga kabatan-onan gikan sa nagkadaiyang barangay sa San Jose.
Sa iyang mensahe, gipadayag ni SK Federation President Kim Valeri Tampon ang iyang pagpasalamat sa mga barangay, youth leaders, ug mga partisipante nga mitampo sa malampusong pagpatuman sa mga kalihokan. Iyang gidasig ang mga kabatan-onan nga magpadayon sa pag-apil ug pagpakita sa ilang mga abilidad isip aktibong kabahin sa komunidad.
Gihatagan usab og gibug-aton ni SB Julmore Pesito ang papel sa mga kalihokan, ilabi na ang sports, sa pagpalambo sa mga kabatan-onan. Pinaagi sa kompetisyon ug pakigbahin sa mga kalihokan, ilang mapalambo ang teamwork, disiplina, respeto, kooperasyon, ug sportsmanship.
Atol sa selebrasyon, gipahigayon ang nagkadaiyang kalihokan ug kompetisyon nga naghatag og higayon sa mga kabatan-onan nga mapakita ang ilang talento, pagkamamugnaon, abilidad sa pagtinabangay, ug aktibong partisipasyon.
Lakip sa mga highlight sa Opening Program ang mga kompetisyon sama sa Team Yell, Team Escort, ug Best in Uniform, diin matag grupo nagpakita sa ilang pagkamamugnaon, koordinasyon, ug panaghiusa.
Dili lamang kompetisyon ang tumong sa Linggo ng Kabataan 2026, kondili usa usab kini ka plataporma aron mapalig-on ang partisipasyon sa mga kabatan-onan sa mga kalihokan sa komunidad. Pinaagi niini, gihatagan sila og luna aron makig-uban sa ilang mga kaedad, makakat-on gikan sa matag kalihokan, ug mapalambo ang ilang pagsalig sa kaugalingon ug abilidad sa pagpangulo.
Ang selebrasyon nagpakita usab sa importansya sa pakigtambayayong tali sa mga youth organizations, barangay, lokal nga panggamhanan, ug uban pang stakeholders sa pagpalambo sa mga programa nga nagtubag sa panginahanglan ug interes sa mga kabatan-onan.
Pinaagi sa padayong paghatag og mga oportunidad alang sa youth participation, gilauman nga mas mapalig-on pa ang papel sa mga kabatan-onan sa San Jose isip aktibong kauban sa pagpalambo sa ilang mga barangay ug sa tibuok komunidad.
Ang Linggo ng Kabataan 2026 nahimong usa ka higayon alang sa mga kabatan-onan sa San Jose nga magkahiusa, makigbahin, ug mapakita ang ilang mga talento ug potensyal, samtang ilang gipalig-on ang mga mithi sa panaghiusa, respeto, kooperasyon, ug responsableng pagpangulo.
