Malampusong gipahigayon ang 2nd Quarter Barangay Population Volunteers (BPVs) Meeting niadtong Hunyo 10, 2026 sa Sangguniang Bayan Session Hall, Municipal Building, Barangay Sta. Cruz, San Jose, Dinagat Islands.

Ang maong panagtigom gipangunahan sa Municipal Civil Registrar’s Office ubos sa pagdumala ni Ana Marie T. Pondoc, Municipal Civil Registrar ug Municipal Population Officer (MPO)-Designate. Mitambong usab si Lucio P. Mercado Jr., Provincial Population Officer, uban sa mga Barangay Population Volunteers gikan sa nagkadaiyang barangay sa munisipyo.

Atol sa miting, gihisgutan ang mga bag-ong kalamboan ug updates kabahin sa implementasyon sa Registry of Barangay Inhabitants and Migrants (RBIM), Accomplishment Report System, ug sa Directional Thrust of the Population and Development (PopDev) Program sa lokal nga lebel.

Gihatagan usab og Certificate of Commendation si former Municipal Population Officer Marina M. Pitogo isip pag-ila sa iyang bililhong kontribusyon ug dedikasyon sa pagpalambo sa Population and Development Program. Giila usab ang iyang papel ug ang paningkamot sa mga stakeholders ug Municipal Population Officers nga nakatampo aron maapil ang Probinsya sa Dinagat Islands sa Top 5 Finalists sa National Validation of the Rafael M. Salas Kaunlarang Pantao Awards niadtong Septyembre 29, 2025.

Pinaagi sa maong panagtigom, gitinguha nga mapalig-on ang koordinasyon tali sa Municipal Civil Registrar’s Office ug sa mga Barangay Population Volunteers aron mas epektibong maimplementar ang Population and Development Program ug uban pang mga inisyatiba nga may kalabutan sa pagdumala sa populasyon ug kalamboan sa komunidad sa San Jose.