Nagpahigayon og emergency meeting ang Municipal Disaster Risk Reduction and Management Council (MDRRMC), ubos sa pagpangulo ni Mayor Ruben J D. Zuniega, chairperson sa MDRRMC, uban sa MDRRMO, niadtong September 2, 2026 sa SB Session Hall, Municipal Building, Sta Cruz, San Jose, Dinagat Islands, aron matubag ang kritikal nga kahimtang sa suplay sa tubig sa tibuok lungsod.

Gipresentar sa miting ang kasamtangang kahimtang sa suplay sa tubig sa matag barangay aron makita ang lebel sa panginahanglan ug ang mga lugar nga mas nanginahanglan og tabang.

Atol sa miting, naghatag og update ang San Jose Water District bahin sa water source ug supply as of September 2, 2026, nga anaa na sa kritikal o emergency nga lebel.

Gisaysay ni Engr. Gravanza, San Jose Water District personnel, nga nakadugang sa kasamtangang sitwasyon ang sunog sa Sitio Manoligao, nga nakaapekto sa ilang mga pipeline ug nahimong hinungdan sa total power shutdown.

Isip tubag sa kakulang sa suplay, nasabutan sa konseho ang water rationing nga duha (2) ka galon matag pamilya, nga 20 litro matag galon, alang sa tibuok San Jose.

Gihisgutan usab ang resolusyon alang sa pagdeklara og State of Calamity sa San Jose isip usa sa mga lakang alang sa pag-atubang sa kasamtangang sitwasyon.

Mitambong sa emergency meeting ang mga representate sa BFP San Jose, San Jose Water District, mga opisyal sa barangay, mga head sa opisina og mga opisyal sa munisipyo, PNP, ug DepEd.

Matud ni Chief of Staff RV Valdevieso, importante ang pagtinabangay ug pagpalig-on sa mga inisyatiba aron sa labing dali nga panahon masulbad ang mga problema nga giatubang sa komunidad.

“Pinaagi sa panaghiusa ug pagtinabangay, atong atubangon ang kasamtangang kahimtang ug pangitaon ang labing maayong paagi aron matubag ang panginahanglan sa katawhan. Nanghinaot kami sa inyong pagsabot ug padayon nga pagtinabangay samtang atong gihimo ang mga kinahanglan nga lakang alang sa atong komunidad.”

— Mayor Ruben J “Kking” D. Zuniega