Usa na usab ka pag-ila ang nadawat ni Mayor Ruben J D. Zuniega atol sa selebrasyon sa ika-35 nga anibersaryo sa Bureau of Fire Protection (BFP) niadtong Agosto 19, 2026, nga gipahigayon sa Hotel Oazis, Butuan City, Agusan del Norte.

Nadawat ni Mayor Zuniega ang Plaque of Recognition gikan sa BFP Caraga Regional Office isip pagpasalamat sa iyang padayong suporta sa San Jose Fire Station, ilabina sa mga inisyatibo nga nakatampo sa pagpalig-on sa operasyon ug paghatag sa mga kinahanglanong suporta alang sa estasyon.

Sumala sa citation sa maong plaque, ang iyang suporta nakatampo sa pagpalig-on sa operational capability sa BFP San Jose, nga makatabang sa paghatag og mas episyente ug epektibong serbisyo sa komunidad.

Gipangunahan ni FCSUPT Honee Fritz N. Abangan-Diel, DSC, Regional Director sa BFP Caraga, ang maong pag-ila pinaagi sa personal nga pagtunol sa Plaque of Recognition ngadto kang Mayor Zuniega, isip pagpasidungog sa iyang kontribusyon sa BFP ug sa fire protection services sa San Jose.

Ang maong pag-ila nagpasidungog sa kontribusyon ni Mayor Zuniega sa fire protection services, samtang nagpasiugda usab sa padayong paningkamot ug panagtambayayong sa Lokal nga Pangagamhanan sa San Jose ug BFP alang sa mas lig-on nga serbisyo ug mas luwas nga komunidad.