SAN JOSE, Dinagat Islands – Malampusong gipahigayon sa Provincial Tourism Culture and the Arts Office (PTCAO), sa pakigtambayayong sa Municipal Tourism Culture and the Arts Office (MTCAO), ang Basic Tour Guiding Training niadtong Mayo 20, 2026 sa Function Hall, Barangay Sta. Cruz, San Jose, Dinagat Islands.

Gitambongan ang maong kalihokan sa 37 ka trainees gikan sa nagkalain-laing barangay sa lungsod, nga nagpakita sa ilang suporta ug interes sa pagpalambo sa lokal nga turismo pinaagi sa propesyonal nga tour guiding.

Atol sa programa, naghatag og mensahe si Provincial Tourism and Culture Officer Benlen Navas, diin iyang gihisgutan ang “Tourism Situationer and Trends.” Gipasiugda niya ang kahinungdanon sa pagsubay sa kasamtangang kahimtang ug mga uso sa industriya sa turismo aron mas maandam ang mga partisipante sa paghatag og kalidad nga serbisyo ngadto sa mga bisita.

Nagbahin usab og mahinungdanong impormasyon si Leah Nanol, Provincial Tourism Officer I, kabahin sa mga kinahanglanon alang sa Tour Guide Accreditation, nga makatabang sa mga partisipante nga mahimong kwalipikado ug akreditadong tour guides sa umaabot.

Gitambungan usab ang maong kalihokan ni Municipal Tourism Officer Mark Paul Bocota uban sa mga kawani sa MTCAO, nga nagpakita sa ilang suporta sa mga programa nga nagtumong sa pagpalig-on sa turismo sa lungsod.

Usa sa mga mensaheng gipasiugda atol sa training mao ang pagpakita og maayong pag-atiman ug pag-abiabi sa mga bisita pinaagi sa panawagan nga “Be Kind sa mga Tourist/Guest.” Gipahinumdoman ang mga partisipante nga ang maayong pakig-uban ug positibong pagtratar sa mga turista adunay dakong papel sa paghimo og maayong impresyon sa destinasyon.

Ang Basic Tour Guiding Training kabahin sa padayon nga paningkamot sa PTCAO ug MTCAO sa pagpalig-on sa kapasidad sa mga lokal nga tour guides ug pag-andam kanila sa paghatag og episyente, responsable, ug dekalidad nga serbisyo ngadto sa mga turista. Pinaagi niini, gilauman nga mas mapalambo pa ang turismo sa San Jose ug mas mapakita ang mga talagsaong atraksyon ug kultura sa Dinagat Islands ngadto sa mas daghang mga bisita.