Ang Local HIV/AIDS Council sa San Jose nagpahigayon sa ilang First Quarter Meeting niadtong Marso 24, 2026 sa SB Session Hall, Sta. Cruz, San Jose. Ang miting gipangunahan ni Dra. Princess Benna B. Ecleo, Municipal Health Officer ug Chairperson sa maong konseho.

Atol sa miting, gipresentar ang pondo para sa Combat HIV/AIDS ug gihisgutan usab ang kasamtangang kahimtang sa HIV sa munisipyo. Gitan-aw sa mga miyembro ang posibleng hinungdan sa pagtaas sa mga kaso ug ang angay nga mga lakang aron mapugngan ang dugang nga pagkatakod.

Gipahinumduman sa mga health officials nga ang HIV (Human Immunodeficiency Virus) usa ka virus nga moatake sa immune system sa tawo ug mahimong mosangpot sa AIDS kung dili matambalan. Gipatin-aw usab nga matakod kini pinaagi sa walay proteksyon nga pakighilawas, pag-ambit sa dagom, pagdawat og kontaminadong dugo, ug gikan sa inahan ngadto sa bata. Apan dili kini matakod pinaagi sa ordinaryong kontak sama sa paglamano, pagdungan og kaon o inom, paak sa lamok, ubo, o bahing.

Aron malikayan ang HIV, gidasig ang paggamit og condom, paglikay sa pag-ambit og dagom, ug kanunay nga pagpa-HIV test. Gipasabot usab ang importansya sa Antiretroviral Therapy (ART) nga makatabang sa pagkontrol sa virus ug makapamenos sa risgo sa pagkatakod sa uban.

Usa sa mga importanteng nasabutan sa konseho mao ang pagpasa og resolusyon alang sa pagpatuman sa ordinansa nga mag-regulate sa operasyon sa nail care providers, tattoo artists, ug aesthetic practitioners. Tumong niini nga masiguro ang kahimsog, kalimpyo, ug proteksyon batok sa HIV ug uban pang mga makatakod nga sakit.

Ang maong miting nagpakita sa padayon nga kooperasyon ug pagpalig-on sa lokal nga mga programa aron maprotektahan ang kahimsog ug kaayohan sa mga molupyo sa San Jose.