SAN JOSE, Dinagat Islands — Malampuson nga gipahigayon ang nationwide simultaneous anti-rabies vaccination sa mga iro niadtong Marso 11, 2026 sa Barangay Hall sa Don Ruben, diin daghang mga tag-iya og iro ang mitambong aron mapabakuna ang ilang mga alagang hayop.

Ang maong kalihokan gipangulohan ni Municipal Agriculturist Jo-Ann Gonzales uban sa Provincial Veterinary Office nga gipangunahan nila Dr. Aimee A. Jimeno, DVM ug Dr. Niel Rosillo, DVM, kauban si Dra. Princess Benna Ecleo, Municipal Health Officer, ug Agricultural Technologist Edna B. Roa. Mitabang usab sa kalihokan ang mga Barangay Kagawad ug Barangay Health Workers aron masiguro ang hapsay nga pagpadagan sa aktibidad.

Ang libreng bakuna kabahin sa selebrasyon sa Rabies Awareness Month ug usa ka lakang sa lokal nga panggamhanan sa San Jose aron mapugngan ang rabies ug masiguro ang kaluwasan sa komunidad.

Ang mga dog owners nagpakita og suporta pinaagi sa aktibong pag-apil ug pagpabakuna sa ilang mga alaga.

“Importante kaayo nga mabakunahan ang tanang iro aron malikayan ang rabies ug maprotektahan ang katawhan,” matod ni Gonzales, nga nagpasiugda sa papel sa komunidad sa pagpugong sa maong sakit.

Gidugang usab ni Dr. Jimeno nga, “Ang rabies makamatay, busa angay natong likayan pinaagi sa pagbakuna sa atong mga alagang hayop.”

Padayon nga pagahimuon sa LGU San Jose, uban sa Provincial Veterinary Office, ang mga vaccination ug awareness campaigns sa tanang 12 ka barangay sa lungsod aron mapalambo ang kahimsog sa katawhan ug maprotektahan ang mga hayop batok sa rabies.

Ang maong inisyatiba nagpakita sa paningkamot sa gobyerno ug komunidad sa pagtinabangay aron makab-ot ang usa ka rabies-free nga San Jose.