Gipalig-on sa lokal nga panggamhanan ang pagpangandam ug mga lakang isip tubag sa nagkakusog nga kainit nga nakaapekto sa suplay sa tubig ug misangpot sa kakulang niini sa nagkalain-laing bahin sa lungsod.
Kabahin sa maong pagpangandam, nagpahigayon og coordination meeting ang Lokal nga Panggamhanan sa San Jose niadtong August 25, 2026, sa Opisina sa Mayor, Municipal Building, Sta. Cruz, San Jose, Dinagat Islands aron hisgutan ang kasamtangang kahimtang sa suplay sa tubig ug ang mga angay nga lakang sa pagtubag niini.
Mitambong sa maong panagtigom ang mga opisyal ug kawani sa BFP, MDRRMO, MENRO, Mayor’s Office, ug Sanitary Officer, nga mipadayag sa ilang tagsa-tagsa ka papel ug responsibilidad sa pagpangandam ug pagtubag sa maong sitwasyon.
Gihisgutan usab ang sunod nga koordinasyon uban sa mga barangay officials sa matag barangay aron mapalambo pa ang mga inisyatibo ug koordinasyon alang sa kaayohan sa komunidad.
Pinaagi sa hiniusang pagplano ug koordinasyon, gitinguha nga mapalig-on ang mga lakang sa lokal nga panggamhanan aron matubag ang kakulang sa tubig ug mahatag ang gikinahanglang tabang sa mga komunidad nga labing nanginahanglan.