San Jose, Dinagat Islands — Nagpahigayon og Full Council Meeting ang Municipal Development Council (MDC) sa LGU-San Jose nga gipangulohan ni MDC Chairperson ug Municipal Mayor Hon. Ruben J “K-king” D. Zuniega niadtong Disyembre 10, 2025 sa Sta. Cruz Function Hall, Sta. Cruz, San Jose. Gitigom niini ang mga pangunang stakeholders aron hisgutan ug i-align ang mga prayoridad sa kalambuan sa lungsod alang sa tuig 2026.
Ang katuyuan sa maong panagtigum mao ang paghisgot sa mga mosunod nga mga agenda:
• Mga konsiderasyon sa pagrepaso sa Barangay Annual Investment Programs (AIPs);
• Estado sa paggamit ug implementasyon sa 2025 Municipal Development Fund (MDF);
• Pag-formulate sa Work and Financial Plan para sa 2026 Development Fund;
• Presentasyon, pagdawat, ug pag-apruba sa Supplemental Investment Program No. 2, Series of 2025; ug
• Annual Investment Program (AIP) para sa tuig 2026.
Gipadayag ni Mayor Zuniega nga ang iyang prayoridad mao ang pagpataas sa income classification sa lokal nga pangagamhanan aron mas epektibong matubag ang kahimtang sa kakabus sa katawhan. “Pinaagi sa pagpalig-on sa atong ekonomiya, makahatag kita og tinud-anay nga solusyon sa dugay nang mga hagit sa kalambuan,” matod pa niya.
Lakip sa mga prayoridad sa 2026 Development Fund mao ang:
• Pagpalambo sa economic enterprises, ilabi na ang beach resort, aron makahatag og dugang kita ug trabaho;
• Pagpalapad sa access sa tubig sa Barangay Luna ug Cuarenta pinaagi sa pag-gahin og local cash counterpart alang sa PRDP sub-project: Construction of Level II Potable Water System;
• Pagtubag sa isyu sa mga layaw nga iro nga hinungdan sa mga aksidente sa kalsada, aron masiguro ang kaluwasan ug kahapsay sa komunidad;
• Pag-ayo ug pagpalig-on sa pito (7) ka Early Childhood Care and Development (ECCD) Learning Centers nga giendorso sa MSWDO, subay sa DSWD standards;
• Pagpaayo sa mga solar streetlights sa Barangay Aurelio aron masiguro ang kahayag ug kaluwasan sa dalan;
• Pagbutang og ambulance bay sa RHU aron adunay kapasilongan ang ambulansya, malikayan ang kadaot niini, ug mapadali ang pagresponde sa mga health-related nga serbisyo.
Gipadayag usab ni Mayor K-King nga ang iyang tinguha mao nga kung magpondo para sa usa ka proyekto, kini kinahanglan nga mahuman ug magamit dayon sa katawhan. Apan kung limitado ang pondo, ang proyekto kinahanglan i-implementar pinaagi sa phased approach, aron bisan pa sa unang hugna, adunay kapuslanan nga mahatag sa komunidad. “Dili angay nga magpabilin lang kini nga nakatiwangwang ug dili magamit sa mga tawo,” iyang giingon.
Tungod niini, sa panagtigum niadtong Hulyo 15, nagmando siya sa tanang implementing offices nga magsumite og tukmang project proposals, lakip ang detalyado nga pondo nga gikinahanglan, aron masusi daan ang kaangayan niini ug mahibal-an kung kini ba mapundohan sa munisipyo o pinaagi sa suporta sa ubang mga ahensya.
Gipadayag usab ni Hon. Gretchen E. Ang, Federated President sa Liga ng mga Barangay, nga nasabutan sa ilang liga nga bahin-bahinon og patas ang pondo sa development fund alang sa tanang barangay. Ang matag barangay na ang magbuot sa pag-allocate niini base sa ilang kaugalingong mga prayoridad nga proyekto, aron aduna’y legasiya nga mabilin ang kasamtangang mga opisyal sa ilang tagsa-tagsa ka barangay.
Kini nga pamaagi sukwahe sa gustong ipatuman ni Mayor K-King, apan iyang girespeto ang kagustuhan sa mayorya sa mga nitambong. Bisan pa sa mainiton nga panaghisgot, nagkasinabot ang konseho aron makab-ot ang tinguha sa maong panagtigum.
Tungod sa kalimitado sa pondo sa munisipyo, nakasabutan sa konseho nga ikansela ang pagpaayo ug pagpalig-on sa 7 ka ECCD Learning Centers ug ang pagpaayo sa mga streetlights sa Barangay Aurelio, aron mahatagan og pondo ang mga barangay nga sila na ang magbuot sa pag-apod-apod niini sumala sa ilang prayoridad.
Gipahimangnoan usab sa MPDC nga ang matag Barangay Annual Investment Program (BAIP) sa 2026 kinahanglan maglakip og mga inisyatibo alang sa:
• Pagpakgang sa kapobrehon;
• Pagtubag sa problema sa Open Defecation;
• Pagpalambo sa turismo; ug
• Pagprebent ug pag-control sa pagkalap sa mga gibawal nga droga.
Anaa usab sa maong panagtigum si MLGOO, LGOO VI Donna Dial Madelo aron maghatag og teknikal nga giya sa panagpulong, uban sa mga representante sa Civil Society Organizations (CSOs) nga aktibong mitambong. Ang maong aktibidad gipasiugdahan sa Municipal Planning and Development Office sa pagpanguna ni MPDC Engr. Froilyn T. Fuentes, EnP.