Usa ka Facebook post nga gipatik niadtong Agosto 18, 2026, gikan sa account nga naggamit sa ngalan nga Dolin Ecleo, ang nakapukaw og pangutana ug concern bahin sa gibug-aton sa rice relief assistance nga gipanghatag ubos sa Local Government Support Fund–General Enhancement Fund (LGSF-GEF) 2026.

Sa maong post, gipahayag nga ang 10-kilos nga rice pack nga nadawat sa nag-post mitimbang lamang og pito ka kilos. Gipahayag usab niya nga imbis 15 kilos ang gitakdang madawat sa matag kwalipikadong pamilya, 12 kilos lamang ang iyang nadawat.

Isip tubag sa maong concern, gipahigayon sa Local Government Unit of San Jose niadtong Agosto 19, 2026 ang usa ka meeting sa Municipal Building, Brgy. Sta. Cruz, San Jose, Dinagat Islands, sa pagpanguna ni Chief of Staff RV Valdevieso, aron masusi ang concern ug mahatagan og klarong katin-awan ang publiko.

Atol sa maong meeting, gihimo ang actual weighing sa random samples sa rice packs aron masuta kung adunay kakulang sa gibug-aton. Base sa mga sample nga nasusi atol sa maong verification, walay nakitang kakulang sa timbang sa mga rice packs nga gitimbang.

Ubos sa maong programa, ang matag kwalipikadong pamilya gitakdang makadawat og kinatibuk-ang 15 kilos nga bugas, nga gilangkuban sa usa ka 10-kilos ug usa ka 5-kilos nga rice pack.

Niadtong Agosto 21, 2026, mipagawas usab og public apology ang maong Facebook account kalabot sa naunang post ug mipahayag og pagpasaylo sa kabalaka nga nahatag niini.

Gipahayag ni Chief of Staff RV Valdevieso nga gihatagan sa lokal nga panggamhanan og hustong pagtagad ang concern nga gipadayag sa publiko pinaagi sa pagsusi niini ug paghatag og klarong katin-awan bahin sa implementasyon sa maong programa.

Matod niya, andam ang administrasyon ni Mayor Ruben J. “Kking” D. Zuniega nga maminaw, mosusi, ug mohatag og hustong aksyon sa mga concern nga ipadayag sa mga benepisyaryo. Gihatagan usab og importansya ang patas ug husto nga pagpatuman sa mga programa ug serbisyo sa munisipyo.

Giawhag ang mga benepisyaryo nga adunay pangutana o concern bahin sa ilang nadawat nga rice relief assistance nga moduol direkta sa munisipyo aron ang ilang concern masusi ug mahatagan og hustong katin-awan ug aksyon.

Padayon nga nagtinguha ang Lokal nga Panggamhanan sa San Jose nga mapalig-on ang transparency, accountability, ug maayong pagserbisyo sa katawhan pinaagi sa hustong pagpatuman ug pagmonitor sa mga programa ug serbisyo alang sa mga residente.