Nadawat sa Lokal nga Panggamhanan sa San Jose ang ₱1,550,000.00 nga pondo gikan sa Department of Science and Technology (DOST) pinaagi sa Smart and Sustainable Communities Program (SSCP) niadtong Hulyo 24, 2026, sa Opisina sa Mayor, Municipal Building, Brgy. Sta. Cruz, San Jose, Dinagat Islands. Ang pondo personal nga gitunol ni Dr. Ann O. Tibe, CESE, Provincial Director sa DOST–PDI, ngadto sa LGU San Jose.

Ang maong pondo gamiton alang sa pagpatuman sa PROGRESS–San Jose (Promoting Resilient Opportunities for Growth through Smart and Sustainable Communities), usa ka proyekto nga nagtumong sa pagpalig-on sa kapasidad ug kalig-on sa komunidad pinaagi sa episyenteng paggamit sa siyensya, teknolohiya, ug inobasyon.

Kabahin usab sa maong kalihokan ang pagpirma sa Memorandum of Agreement (MOA) tali sa Lokal nga Panggamhanan sa San Jose ug sa Department of Science and Technology (DOST) Caraga alang sa implementasyon sa PROGRESS–San Jose.

Nagpasalamat ang Lokal nga Panggamhanan sa San Jose, nga gipangulohan ni Mayor Ruben J D. Zuniega, sa Department of Science and Technology alang sa padayon nga pagsalig ug suporta pinaagi sa Smart and Sustainable Communities Program. Gilauman nga ang maong inisyatiba makatampo sa padayon nga kalamboan sa San Jose pinaagi sa mga programa ug solusyon nga nakabase sa siyensya, teknolohiya, ug inobasyon.