Usa sa mga padayong gipaningkamotan sa Lokal nga Panggamhanan sa San Jose, ubos sa administrasyon ni Mayor Ruben J. D. Zuniega, ang pagpalig-on sa mga programa ug serbisyo batok sa problema sa illegal nga droga, lakip ang paghatag og angay nga tabang ug suporta sa mga indibidwal nga nagpailalom o nakakompleto na sa drug rehabilitation program.
Kabahin sa maong paningkamot ang pagpalig-on sa pakigtambayayong sa Drug Treatment and Rehabilitation Center (DTRC) Caraga aron mas mapalambo ang mga serbisyo alang sa mga kliyente nga anaa sa proseso sa recovery ug reintegration ngadto sa ilang pamilya ug komunidad.
Niadtong Agosto 20, 2026, mipirma ang LGU San Jose ug DTRC Caraga og Memorandum of Agreement (MOA) alang sa pagpalig-on sa Aftercare Program para sa mga kliyente nga nakakompleto o nagpadayon sa ilang proseso sa rehabilitasyon.Pinaagi sa maong kasabutan, gitinguhang mapalambo ang koordinasyon tali sa lokal nga panggamhanan ug DTRC Caraga sa paghatag og suporta sa mga kliyente isip kabahin sa ilang padayong recovery. Ang Aftercare Program nagtutok sa paghatag og suporta human sa rehabilitation aron matabangan ang mga kliyente sa ilang pagbalik sa normal nga pagpuyo ug aktibong partisipasyon sa pamilya ug komunidad.
Kabahin usab sa maong kasabutan ang pag-adopt sa Yakap Bayan Program sa Department of Social Welfare and Development (DSWD) isip dugang nga mekanismo sa paghatag og suporta sa mga benepisyaryo. Pinaagi niini, gilauman nga mas mapalapad ang access sa mga benepisyaryo ngadto sa angay nga social protection services ug interventions nga makatabang sa ilang padayon nga pagbangon ug pagbalik sa komunidad.
Ang maong partnership nagpalig-on sa hiniusang paningkamot sa lokal nga panggamhanan ug mga partner agencies sa paghatag og holistic ug padayon nga suporta sa mga indibidwal nga naapektuhan sa problema sa illegal nga droga. Gihatagan og importansya niini ang rehabilitasyon dili lamang isip proseso sa pagtambal, apan lakip usab ang aftercare, reintegration, ug pagpalig-on sa suporta gikan sa pamilya ug komunidad.
Pinaagi sa padayong koordinasyon sa nagkalain-laing ahensya ug stakeholders, nagtinguha ang LGU San Jose nga mapalambo ang mga programa nga makatubag sa panginahanglan sa mga kliyente ug benepisyaryo ug makatampo sa pagtukod sa usa ka mas luwas, himsog, ugsuportadong komunidad.
Ang MOA tali sa LGU San Jose ug DTRC Caraga nagrepresentar sa dugang nga lakang sa pagpalig-on sa lokal nga mga inisyatiba alang sa rehabilitation, aftercare, ug community reintegration, uban ang tumong nga matagaan ang mga kliyente og angay nga suporta samtang nagpadayon sila sa ilang proseso sa pagbangon ug pagbalik sa komunidad.