Gihatag sa Department of Social Welfare and Development Field Office Caraga, pinaagi sa Sustainable Livelihood Program (SLP)kauban si Mayor Ruben J “Kking” D. Zuniega, ang PHP 20,000 nga livelihood assistance kang Mhe Ann G. Caduyac, nagdaog sa Walang Gutom Kusinero Cook-Off Challenge Season 2, atol sa payout ceremony karung adlawa Abril 16, 2026 sa opisina ni Mayor , Municipal Building,Bgry. Sta.Cruz,San Jose, Dinagat Islands.

Ang maong pinansyal nga tabang magsilbing dugang kapital sa iyang kasamtangang food vending business, nga gilauman makatabang sa pagpalig-on ug pagpadayon sa mas lig-on ug malungtarong panginabuhian.

Kabahin kini sa padayon nga implementasyon sa DSWD-SLP, nga nagtumong sa pagpausbaw sa socio-economic nga kahimtang sa mga kabus, bulnerable, ug marginalized nga sektor pinaagi sa mga oportunidad sa panginabuhian ug capacity-building nga mga interbensyon.

Nitambong usab si MSWD Officer Joy S. Parajes, RSW, DSWD-SLP Provincial Coordinator Nestor F. Carmen, DSWD-WGP Community Engagement Coordinator Chris Ian P. Dayag, uban sa ubang SLP staff ug LGU personnel.

Gipadayag ni Mayor Kking ug sa lokal nga panggamhanan ang ilang suporta sa padayon nga pakigtambayayong tali sa nasyonal ug lokal nga gobyerno sa pagpalambo sa sustainable livelihood programs sa lungsod, ug ilang gipasiugda ang responsableng paggamit sa grant aron masiguro ang kalampusan sa microenterprise.

Ang nagdaog nga si Mhe Ann G. Caduyac mipadayag usab sa iyang pagpasalamat:

“Dako akong pasalamat sa DSWD-SLP, WGP, ug sa lokal nga panggamhanan sa ilang suporta ug pagsalig kanamo pinaagi niining pinansyal nga tabang. Kini usa ka dakong oportunidad para sa among panginabuhian ug kaayohan sa komunidad. Gamiton nako kini sa husto ug responsableng paagi aron mapalig-on pa ang among panginabuhian. Daghang salamat ug padayon ta sa sustinableng panginabuhian para sa mas maayong kaugmaon.”

Ang maong livelihood assistance nagpakita sa padayon nga pasalig sa DSWD-SLP sa paghatag og sustenableng ug inklusibong oportunidad sa panginabuhian, subay sa tumong sa gobyerno nga pakunhuran ang kakabos ug palig-onon ang mga komunidad nga makabarog sa ilang kaugalingon.