Gipahigayon ang Pre-Construction Meeting alang sa Improvement of Brgy. San Juan Multi-Purpose Building sa Barangay San Juan, San Jose, Dinagat Islands, niadtong August 11, 2026, isip pagpangandam alang sa pagsugod sa maong proyekto.
Atol sa miting, gihisgutan ang mga technical specifications, scope of work, proseso sa implementasyon, ug uban pang importanteng detalye sa proyekto, diin gipatin-aw ni Junibel T. Wenceslao ang mga importanteng aspeto sa pagpatuman niini.
Gipasiugda usab ni Bonifacio G. Trangia, Project Monitoring and Safety Officer, ang kamahinungdanon sa pagsunod sa mga safety measures atol sa construction, lakip ang hustong pagdumala sa work area ug paggamit sa Personal Protective Equipment (PPE) aron masiguro ang kaluwasan sa mga trabahante ug sa mga tawo nga mahimong maapektuhan atol sa construction activities.
Sa iyang mensahe, gipadayag ni Vice Mayor Rechard T. Pasquil ang iyang paglaum sa maayong pagtinabangay ug koordinasyon tali sa LGU, barangay, ug kontraktor aron masiguro ang hapsay nga pagpatuman sa proyekto, samtang gilauman usab niya nga ang maong proyekto makahatag og mas angay nga lugar alang sa mga kalihokan ug serbisyo sa komunidad.
Gipangunahan ni Engr. Ariane T. Buhian, OIC Municipal Engineer, ang maong miting uban sa mga miyembro sa Project Monitoring Team, kauban si Vice Mayor Rechard T. Pasquil, mga opisyal sa Barangay San Juan, ug mga representante sa Bamboe Construction, nga maoy contractor sa proyekto.
Nagpadayon ang mga inisyatiba sa lokal nga panggamhanan alang sa pagpalambo sa mga pasilidad ug serbisyo aron matubag ang nagkalain-laing panginahanglan sa lungsod.