Gipasidunggan sa Department of Social Welfare and Development (DSWD) Field Office Caraga ang Lokal nga Panggamhanan sa San Jose, Dinagat Islands pinaagi sa Pagkilala sa Natatanging Kontribusyon o “PaNata Ko sa Bayan Awards” nga gipahigayon virtual niadtong Mayo 14, 2026, isip kabahin sa pagsaulog sa ika-75 nga anibersaryo sa ahensya.

Nadawat sa Munisipalidad sa San Jose ang Gawad Serbisyong Mahusay Regional Winner for Older Persons Sector Category, isip pag-ila sa padayon ug matinud-anong paningkamot sa pagpatuman sa mga programa ug serbisyo nga nagpalambo sa kaayohan, proteksyon, ug dignidad sa mga senior citizen sa komunidad.

Ang maong kadungganan nagpakita sa lig-on nga paningkamot sa lokal nga panggamhanan sa paghatag og episyente ug kalidad nga serbisyo publiko alang sa sektor sa mga tigulang.

Dako usab ang pasalamat sa munisipyo ngadto sa mga opisyal ug kawani nga adunay dakong kontribusyon sa maong kalampusan, ilabina nila:
• Hon. Mayor Ruben J D. Zuniega
• MSWDO Officer Joy P. Parajes, RSW
• Older Persons Sector Focal Person Lian C. Alfeche

Nagpadayon ang Municipal Government of San Jose sa pagpalig-on sa mga programa ug inisyatiba nga naghatag og suporta ug proteksyon sa mga senior citizen isip kabahin sa tumong sa munisipyo nga masiguro ang inclusive ug maayong serbisyo alang sa tanang sektor sa katilingban.

Ang maong pagpasidungog usa ka pagpamatuod sa dedikasyon ug matinud-anong pag-alagad sa lokal nga panggamhanan alang sa kaayohan sa katawhan.