Malampusong gipahigayon karong adlawa, Abril 28, 2026, ang usa ka mahinungdanong kalihokan nga nagpunting sa Gender and Development (GAD) ug Tourism Industry Crime Prevention sa Municipal Grounds, Barangay Sta. Cruz, San Jose, Dinagat Islands.

Gitambungan ang maong aktibidad sa mga boat driver ug nagkadaiyang tourism stakeholders sa lungsod, nga nagpakita sa ilang aktibong partisipasyon sa pagpalambo sa luwas ug responsableng turismo sa lugar.

Tumong sa kalihokan ang pagpalalom sa kahibalo sa mga partisipante mahitungod sa seguridad sa industriya sa turismo, ilabina sa pagpanalipod sa kababayen-an ug kabataan pinaagi sa pagpasabot sa mga balaod nga naglangkob niini.

Sa pagsugod sa programa, si Provincial Tourism Officer I Lea Pelegrino Nanol maoy nanguna sa recalling of participants aron matimbang ang ilang nasabtan gikan sa mga miaging diskusyon ug mapalig-on pa ang ilang kahibalo sa hilisgutan.

Gisundan kini sa welcome message ni Provincial Tourism and Culture Officer Benlen Navas, nga mainiton nga midawat sa mga partisipante ug nagpasiugda sa kahinungdanon sa panagtinabangay tali sa gobyerno ug komunidad aron mapadayon ang malinawon ug luwas nga turismo sa probinsya.

Usa sa mga highlight sa kalihokan mao ang lecture nga gihatag ni PLT Creztadel L. Goring, PWCPD Officer sa Dinagat Islands PPO. Iyang gihisgutan ang mga balaod ug proteksyon alang sa kababayen-an ug kabataan, ug gipasiugda ang importansya sa pag-atiman sa mga mas nanginahanglan sa katilingban. Matud pa niya, “those who have less in life should have more in laws.”

Samtang, si Charisma Angelie Raganas, MTCAO Staff, naghatag usab sa mensahe nga gipadala ni Municipal Community Affairs Officer II Paul Mark Q. Bocota, nga naghatag og dugang inspirasyon ug suporta sa maong inisyatibo.

Ang kalihokan kabahin sa padayon nga paningkamot sa lokal nga gobyerno sa San Jose aron mapalambo ang turismo sa lungsod samtang ginaseguro ang kaluwasan, kaayohan, ug proteksyon sa tanang miyembro sa komunidad.