SAN JOSE, DINAGAT ISLANDS — Isip kabahin sa pagsiguro sa kalidad, hustong pagpatuman, ug pagkompleto sa mga proyekto sa lokal nga panggamhanan, gipahigayon niadtong Agosto 10, 2026 ang final inspection sa mga solar-powered streetlight projects nga nahimutang sa upat ka barangay sa San Jose.

Sakop sa maong inspeksyon ang mga proyekto sa Brgy. Justiniana Edera, Brgy. Don Ruben, Brgy. Poblacion, ug Brgy. Matingbe, diin gisusi ang kasamtangang kahimtang, kalidad, ug pagkompleto sa mga na-instalar nga solar-powered streetlights.

Kabahin usab sa inspeksyon ang pagtan-aw kung ang mga nahimo nga installation nagsunod sa gikatakdang specifications ug standards sa proyekto, ingon man ang pag-ila sa mga aspeto nga nagkinahanglan pa og pagtagad aron masiguro ang hustong pagkompleto niini.

Mitambong sa maong final inspection si Vice Mayor Rechard T. Pasquil, kauban sila Engr. Rudito Q. Urbano Jr., Engr. Ariane T. Buhian, Engr. Sany Olpos, ug Richard S. Barroa sa BARRS Construction and Services, uban sa mga representante ug opisyales sa mga barangay nga sakop sa proyekto.

Ang final inspection usa sa mga lakang sa pagmonitor sa mga proyekto aron masuta ang kalidad sa trabaho ug ang kahimtang sa mga pasilidad sa dili pa ang hustong pagkompleto ug pag-turnover niini, subay sa mga kinahanglanon sa proyekto.

Nagpadayon ang Lokal nga Panggamhanan sa San Jose sa pagmonitor ug pag-evaluate sa mga proyekto nga ginapatuman sa nagkalain-laing barangay aron masiguro ang hapsay nga pagpatuman, kalidad sa mga imprastraktura, ug malampusong pagkompleto niini alang sa kaayohan sa komunidad.

Ang maong mga solar-powered streetlights gitumong usab nga makatampo sa pagpaayo sa suga sa mga apektadong lugar ug sa paghatag og mas luwas ug mas maayong kahimtang sa komunidad, ilabi na panahon sa gabii.