Malampusong gipahigayon niadtong Marso 30, 2026, sa Provincial Guest Center ang Women’s Month Culmination nga may temang “Lead Like Babaylans, Filipinas.” Ang maong kalihokan kabahin sa pagsaulog sa National Women’s Month 2026 nga nagpasidungog sa gahum ug kontribusyon sa kababayen-an sa katilingban.

Usa sa mga highlight sa maong selebrasyon mao ang paghatag og dungog sa mga talagsaong kababayen-an pinaagi sa Dinagat Islands Outstanding Women Awards (DIOWA). Gipasidunggan si Lynn Sheryl T. Reasol, Founder sa Binuhat Arts and Crafts Trading, isip Outstanding Woman in Community & Civic Leadership tungod sa iyang dakong papel sa pagpalambo sa komunidad ug pagpalig-on sa lokal nga panginabuhian.

Samtang, giila usab si Wilma G. Cabizares, usa ka SPED teacher, isip 2nd Runner-Up sa Outstanding Women in Public Service, ilabi na sa iyang dedikasyon sa pagserbisyo sa mga kabataan nga adunay espesyal nga panginahanglan.

Ang DIOWA usa ka inisyatibo nga naghatag bili ug pag-ila sa kontribusyon sa mga babaye sa kalamboan sa probinsya, ilabi na sa ilang papel isip lider, magtutudlo, ug ehemplo sa komunidad.

Ang LGU-San Jose mainiton nga mihatag og pagbati sa pag-congratulate sa mga awardees ug nagpasalamat sa ilang padayon nga dedikasyon ug serbisyo. Ang kalampusan sa mga kababayen-an nagpadayon sa paghatag inspirasyon sa tanang San Josenian nga molihok alang sa mas maayong kaugmaon.

Ang maong kalihokan nagpamatuod nga ang kababayen-an adunay dakong papel sa paggiya ug pagpalambo sa katilingban—sama sa mga babaylan sa karaang panahon nga nagdala og kaalam, kaisog, ug paglaum.