SAN JOSE, Dinagat Islands — Malampusong gipahigayon karong adlawa, Pebrero 24, 2026, ang distribusyon sa mga suplay o personal protective equipment (PPEs) alang sa mga barangay tanod sa munisipyo sa San Jose.

Ang maong kalihukan gipahigayon sa DILG Office sulod sa Municipal Building sa Barangay Sta. Cruz, diin nagtigum ang mga representante gikan sa nagkadaiyang barangay aron modawat sa ilang kinahanglanon nga kagamitan.

Personal nga mitunol sa mga PPEs si Mayor Ruben J “Kking” D. Zuniega, kauban si Municipal Local Government Operations Officer (MLGOO) Donna Dial D. Madelo.

Sumala sa lokal nga panggamhanan, ang paghatag og PPEs usa ka importante nga lakang aron masiguro nga ang mga barangay tanod adunay igong proteksyon ilabina sa ilang adlaw-adlaw nga pakig-atubang sa lain-laing sitwasyon sa komunidad. Giila usab sa LGU ang ilang papel isip haligi sa kalinaw ug kaayohan sa matag barangay, busa ang paghatag og suporta sama niini maoy usa sa mga prayoridad sa administrasyon.

Gipasiugda usab nga ang maong inisyatibo kabahin sa mas lapad nga programa sa munisipyo nga nagpunting sa pagpalig-on sa peace and order framework sa San Jose. Pinaagi sa paghatag og angay nga kagamitan, mas mapalig-on ang kapasidad sa mga tanod sa epektibong pagdumala sa ilang mga buluhaton ug sa pagseguro sa kaluwasan sa katawhan.

Nagpasalamat ang mga barangay tanod sa maong tabang gikan sa lokal nga panggamhanan, nga ilang giila nga dako’g ikatabang sa ilang adlaw-adlaw nga serbisyo. Nagpahayag usab sila sa ilang padayon nga dedikasyon sa pagpanalipod ug pag-alagad sa komunidad bisan pa sa mga hagit nga ilang ginaatubang.

Padayon ang LGU San Jose sa pagpatuman sa mga programa nga naghatag og suporta sa grassroots level, ilabina sa mga indibidwal nga nag-una sa pagserbisyo sa katawhan. Pinaagi sa ingon nga mga inisyatibo, ginapakita sa lokal nga panggamhanan ang ilang komitment sa pagpalig-on sa usa ka luwas, organisado, ug malamboong komunidad alang sa tanang residente sa San Jose.