Gipahigayon ang Annual General Membership Meeting sa San Jose Dinagat Islands Municipal Employees Association, Inc. (SJDIMEA) niadtong Pebrero 25, 2026 sa SB Session Hall, Municipal Building sa Barangay Sta Cruz, San Jose, Dinagat Islands.

Ang maong tigum gipangunahan ni SJDIMEA President Jurie S. Mancia, diin gitambongan sa mga miyembro sa asosasyon ug ubang opisyal sa lokal nga panggamhanan.

Lakip sa mga gihisgutan sa agenda ang mga pag-usab sa Collective Negotiation Agreement (CNA) amendments. Gituki sa maong panagtigum ang mga proposed nga kausaban aron mas mapalig-on pa ang kasabutan ug mapauswag ang kaayohan sa mga miyembro, nga gisuportaan ni Municipal Mayor Ruben J D. Zuniega.

Sunod niini, gihimo ang eleksyon sa bag-ong set of officers sa SJDIMEA alang sa tuig 2026. Miresulta kini sa pagkapili pag-usab sa incumbent President nga si Jurie S. Mancia isip pangulo sa asosasyon, kauban sa mga bag-ong napili nga Board of Trustees.

Human sa pormal nga kalihokan, nagpadayon ang selebrasyon alang sa mga miyembro nga nagsaulog og ilang mga adlawng natawhan. Nagsunod usab ang raffle draw isip pasalamat sa mga mitambong, nga nakahatag og kalipay ug kadasig sa tanan.

Ang maong tinuig nga kalihokan nagpadayon isip pamaagi sa pagpasiugda sa liderato, panaghiusa, ug kooperasyon sa mga empleyado sa lokal nga panggamhanan.