SAN JOSE, Dinagat Islands — Nagpahigayon og Child-Friendly Local Governance Audit (CFLGA) Meeting ang Lokal nga Panggamhanan sa San Jose niadtong Pebrero 25, 2026 sa Mayor’s Office, Municipal Building, Barangay Sta. Cruz, isip kabahin sa padayon nga paningkamot sa lungsod sa pagpalig-on sa mga programa ug serbisyo alang sa kabatan-onan.
Ang maong miting gipangulohan ni Mayor Ruben J “Kking” D. Zuniega uban ang presensya sa mga nagkadaiyang opisyal ug stakeholders nga adunay dakong papel sa pagpatuman sa child-friendly initiatives sa lungsod. Lakip sa mitambong si MLGOO Donna Dial D. Madelo, ingon man ang mga representante gikan sa Municipal Health Office nga sila Irene Rose E. Siarez, Dra. Princess Benna B. Ecleo, ug Florentina T. Larios.
Mitambong usab si MSWDO Joy P. Perajes, RSW, uban ang MSWD staff nga si Dizza S. Salva, si PCPL Chain Pearl B. Sumampong gikan sa kapulisan, PSDS Elias S. Durero gikan sa sektor sa edukasyon, ug MPDC Engr. Froilyn Fuentes.
Gihisgutan sa miting ang preparasyon alang sa tinuig nga Child-Friendly Local Governance Audit, usa ka mekanismo nga gigamit aron masukod ang kahimtang sa mga lokal nga programa nga nagpanalipod ug nagpalambo sa kaayohan sa kabatan-onan. Gi-review sa mga partisipante ang nag-unang indicators nga naglangkob sa lima ka importanteng aspeto sa katungod sa bata: survival, development, protection, participation, ug good governance.
Sa aspeto sa survival, gi-evaluate ang mga serbisyo sa panglawas ug nutrisyon nga gihatag sa mga kabataan, lakip na ang access sa basic health services ug immunization programs. Sa development, gipasiugda ang kahinungdanon sa edukasyon ug early childhood care aron masiguro ang husto nga pagtubo ug paglambo sa mga bata, samtang sa proteksiyon, gihisgutan ang mga lakang batok sa pang-abuso, eksploitasyon, ug uban pang hulga sa kaluwasan sa kabatan-onan.
Gihatagan usab og dakong pagtagad ang participation, diin gidasig ang aktibong partisipasyon sa kabatan-onan sa mga programa ug desisyon sa komunidad, ingon man ang good governance, nga nagpunting sa epektibo ug responsableng pagdumala sa lokal nga panggamhanan alang sa interes sa mga bata.
Sumala sa LGU San Jose, ang CFLGA dili lamang usa ka assessment tool kondili usa usab ka giya aron mapalambo pa ang mga existing nga programa ug makahimo og bag-ong inisyatibo nga mas makatubag sa panginahanglan sa kabatan-onan. Kini usab naghatag og oportunidad sa lain-laing ahensya ug sektor nga magtinabangay aron mas mapalig-on ang child protection system sa lungsod.
Gipahayag ni Mayor Zuniega ang padayon nga suporta sa lokal nga panggamhanan sa tanang programa nga naghatag og kaayohan sa kabatan-onan, ug iyang gi-encourage ang tanang stakeholders nga magpadayon sa panaghiusa aron masiguro ang usa ka luwas, malipayon, ug maayong kaugmaon alang sa mga bata sa San Jose.
Padayon ang LGU San Jose sa pagpaningkamot nga mahimong ehemplo sa usa ka child-friendly nga lungsod pinaagi sa pagpatuman sa mga polisiya ug programa nga nagbutang sa kaayohan sa kabatan-onan isip prayoridad. Sa umaabot nga CFLGA assessment, naglaum ang lungsod nga mapadayon ug mapalambo pa ang ilang kahimtang isip usa ka komunidad nga nag-amuma ug nagpanalipod sa katungod sa matag bata.