Malampuson nga gipahigayon sa Municipal Health Office sa Local Government Unit (LGU) San Jose ang Buntis Congress 2026 niadtong Abril 6, 2026 sa Brgy. Justiniana Edera Function Hall, nga nagtumong sa paghatag og kahibalo, serbisyo, ug suporta sa mga nagdadalang inahan sa lungsod.

Ang maong kalihokan gitambongan sa 48 ka buntis gikan sa nagkalain-laing barangay sa San Jose. Personal usab nga mitambong si Mayor Ruben J. D. Zuniega aron ipakita ang iyang bug-os nga suporta sa mga programa nga nagatutok sa maternal health ug kahimsog sa pamilya.

Ang Buntis Congress usa ka tinuig nga inisyatibo sa LGU San Jose nga nagtinguha sa pag-edukar sa mga buntis mahitungod sa husto nga pag-atiman sa ilang lawas, nutrisyon, ug mga pamaagi aron masiguro ang luwas nga pagbuntis ug himsog nga pagpanganak alang sa inahan ug bata.

Gipangulohan ang kalihokan nila Dra. Princess Benna B. Ecleo, MD, Municipal Health Officer, ug Dra. Joan Aileen B. Lingayo, Rural Health Physician. Aktibo usab nga misalmot ang mga personahe sa Rural Health Unit San Jose, kauban ang DOH-Human Resource for Health (DOH-HRH), nga naghatag og technical assistance ug dugang kahibalo sa mga partisipante.

Usa sa mga pinakaimportante nga serbisyo nga gihatag mao ang libre nga pelvic ultrasound, nga gihimo pinaagi sa pakigtambayayong sa Dinagat District Hospital. Gihatagan usab ang mga buntis og T-shirts ug buntis kits isip suporta sa ilang adlaw-adlaw nga panginahanglan ug pag-atiman sa ilang pagbuntis.

Gipakita sa maong kalihokan ang kahinungdanon sa kooperasyon sa lokal nga gobyerno ug health sector sa pagpanalipod sa kahimsog sa mga inahan ug bata. Dugang pa niini, gipalig-on sa LGU San Jose ang ilang pasalig sa padayon nga paghatag og dekalidad nga serbisyo sa kahimsog alang sa tibuok komunidad.

Padayon nga gipatuman sa LGU San Jose ang mga programa nga nagatutok sa maternal and child health, isip kabahin sa ilang tumong nga mapalambo ang kalidad sa kinabuhi sa matag pamilya ug masiguro ang mas lig-on ug mas himsog nga komunidad sa umaabot.