Malampusong gipahigayon ang Bid Opening niadtong Mayo 14, 2026 sa Municipal BAC Office sa Barangay Sta. Cruz, San Jose, Dinagat Islands, isip kabahin sa padayon nga pagpatuman sa transparent, patas, ug organisadong proseso sa pagdumala sa mga proyekto sa lokal nga panggamhanan.

Gitambungan ang maong kalihokan nila MPDC ug BAC Chairperson HR Designate Froilyn Fuentes, Municipal Engineer ug BAC Member Alex Navarra, Statistician I Doncie M. Paquibot, Project Evaluation Officer Rudito Urbano Jr., BAC Member Ana Marie T. Pondoc, ug BAC Member Jade S. Maybuena.

Atol sa kalihokan, gihisgutan ang Schedule of Procurement Process alang sa nagkalain-laing proyekto nga pagatumanon sa munisipyo. Lakip niini ang pagpalit ug pagbutang sa solar-powered streetlights sa Barangay Matingbe, Barangay Don Ruben, Barangay Justiniana Edera, ug Barangay San Jose (Poblacion).

Gipresentar usab ang mga plano alang sa rehabilitation ug improvement sa Sta. Cruz Pre K–2 ECCD Learning Center, RHU Main Building, ug Matingbe ECCD Learning Center aron mapalambo pa ang kalidad sa serbisyo ug pasilidad alang sa komunidad.

Ang maong kalihokan gihimo aron masiguro nga patas, klaro, ug husto ang proseso sa pagpili sa mga proyekto ug serbisyo nga ipatuman sa lokal nga panggamhanan.

Nagpakita kini sa padayon nga paningkamot sa Munisipyo sa San Jose sa pagpalig-on sa maayong pagdumala, transparency, ug paghatag og mas episyente nga serbisyo alang sa katawhan.