Gipahigayon ang pag-apod-apod sa subsidy gikan sa Department of Social Welfare and Development (DSWD) alang sa mga kwalipikadong bao-bao drivers sa lungsod sa San Jose niadtong Abril 16, 2026.

Ang maong kalihokan gipangulohan sa Municipal Traffic Office isip tubag sa pagsaka sa presyo sa gasolina nga nakaapekto sa adlaw-adlaw nga kita sa mga drayber.

Sumala sa datos, kinatibuk-ang 316 ka benepisyaryo ang nakadawat sa maong pinansyal nga tabang. Ang subsidy gitumong aron maminusan ang kabug-at sa gasto sa gasolina ug matabangan ang mga drayber nga padayon nga makapanginabuhi bisan pa sa nagkataas nga presyo sa petrolyo.

Gipahibalo usab sa mga otoridad nga kadtong mga benepisyaryo nga wala makatunga sa maong distribusyon mahimo gihapon makakuha sa ilang subsidy pinaagi sa pag-adto sa DSWD office hangtod sa Abril 21, 2026. Gidasig ang tanang kwalipikado nga siguruhon ang pag-angkon sa maong ayuda sulod sa gitakdang panahon.

Sa pahayag ni Mayor Kking, iyang gipadayag ang pagpasalamat alang sa suporta nga gihatag sa nasudnong ahensya ngadto sa mga drayber, “Mapasalamaton kita sa nadawat nga subsidy, apan magpadayon usab kita sa pag-ampo nga unta mahoman na ang krisis nga atong giatubang,” matud pa niya.

Dugang pa, giingon sa lokal nga panggamhanan nga magpadayon kini sa pakigtambayayong sa mga ahensya sa gobyerno aron makapangita og dugang solusyon nga makatabang sa sektor sa transportasyon, ilabina sa panahon nga nag-atubang ang nasud sa pagsaka sa presyo sa mga batakang panginahanglan.

Nagpasalig ang LGU San Jose nga magpadayon sa paghatag og suporta ug serbisyo alang sa katawhan, ilabina sa mga sektor nga direktang naapektuhan sa kasamtangang kahimtang sa ekonomiya.