Malampusong gisaulog sa Municipality of San Jose ang 128th Philippine Independence Day Celebration niadtong June 12, 2026 sa Municipal Compound, Sta. Cruz, San Jose, Dinagat Islands, diin nagkahiusa ang mga national line agencies, municipal officials, ug mga empleyado sa lokal nga gobyerno sa pagpasidungog sa Araw ng Kalayaan usa ka dakong okasyon nga nagpahinumdom sa bili sa kagawasan nga atong natagamtaman.
Sa opening program, gipahinumduman ni Vice Mayor Rechard T. Pasquil nga ang kagawasan nga atong natagamtaman karon dili sayon nga nakuha kondili gibayran sa kaisog, pag-antos, ug walay katapusang sakripisyo sa atong mga bayani.
Busa, ang pagsaulog sa Araw ng Kalayaan dili lamang paghinumdom sa kasaysayan, kundili usa usab ka pahinumdom nga ang kagawasan adunay kaakibat nga responsibilidad ang pag-amuma ug paghigugma sa yutang natawhan ug ang pagtinabangay alang sa padayon nga kalamboan sa nasud ilabi na sa lungsod sa San Jose.
Sa iyang Independence Day message, gipadayag ni Mayor Ruben J “Kking” D. Zuniega:
“Pilion nato nga mahimong malipayon sa matag adlaw nga atong giatubang, kay ang tinuod nga kagawasan ania ra kanato. Sa tinuod nga diwa sa kagawasan, nagkinahanglan kini og respeto, disiplina, ug kahibalo sa pagbuhat sa sakto. Busa, magtinabangay kita ang Munisipyo sa San Jose kauban ang tanang opisyales, empleyado, ug katawhan—aron magpadayon sa pagbuhat sa angay buhaton ug paglikay sa dili angay, alang sa kalinaw, kauswagan, ug padayon nga kalamboan sa atong lungsod.”
Dugang pa niini, naghatag ug nagkahiusang panan-aw ug direksyon ang mga mensahe nila SB Clica ug SB Portullano sa pagpasiugda sa kahinungdanon sa kalayaan ug patas nga katungod sa tanan.
Gipahayag ni SB Clica Antipolo ang kahimtang ug kahinungdanon sa kababayen-an, diin iyang gihatagan og gibug-aton ang ilang dakong papel sa paghulma sa katilingban.
Samtang si SB Toto Portullano mipadayag usab sa importansya sa diwa sa kagawasan pinaagi sa respeto, patas nga oportunidad, ug pag-ila sa papel sa tanang sektor sa komunidad sa pagpalambo sa lungsod.
Sa bahin sa kabatan-onan, gipadayag ni SK Federated President Kim Valeri Tampon nga ang mga kabatan-onan adunay kritikal nga papel sa pagpadayon sa diwa sa kagawasan pinaagi sa responsableng pagpangulo, disiplina, ug aktibong partisipasyon sa nasudnong kalamboan.
Ang maong selebrasyon nagpamatuod nga ang Araw ng Kalayaan dili lamang paghinumdom sa kagahapon, kundili padayon nga panaw sa pagpanalipod sa kagawasan ug pagpalig-on sa nagkahiusang San Jose ug mas lig-on nga Pilipinas.
