Nagpatawag sa usa ka Emergency Meeting ang Chairman sa Committee on Health nga si SB Member Papias Tuquib kagahapon, January 6, 2020 nga gipahigayon sa pinuy-ana ni Aurelio Barangay Kapitan Ruben J Zuniega sa Aurelio, San Jose, Dinagat Islands.

Gitambungan kini ni Mayor Yngwie Hero B. Ecleo, 12 ka Barangay Kapitan, Municipal Information Officer, MDRRMO, representante sa Municipal Environment Natural Resources Office, personahe sa Provincial Health Office, personahe sa Provincial Information Office, personahe sa Municipal Health Office ug representate gikan sa DepEd.

Sa maong panagtigom gihisgutan ang pagtaas sa kaso sa Dengue dinhi sa atong probinsiya ilabina sa Municipyo sa San Jose. Nasayran basi sa datos sa 2018 nga adunay 240 ka kaso ug ang 2019 adunay 740 nga kaso nga suspected dengue sa tibook probinsiya sa Dinagat Islands nga halos 208% ang pag taas niini sulod lamang sa usa ka tuig.

Ang San Jose sugod Enero 1 hangtod Desyembre 26, 2019 adunay 167 ka kaso sa dengue nga ang duha (2) niini nawad-an sa kinabuhi kompara sa 2018 nga adunay 73 ka kaso og usa (1) ang nawad-an sa kinabuhi nga adunay 129% nga pagtaas sulod sa usa ka tuig.

Ang Provincial Health Office nagpahibalo nga ang gihangyo sa Municipiyo sa San Jose nga magmisting sa tibook lungsod aduna nay kimikal nga magamit niini ug pwede ng magsugod bisan unsang adlawa. Gipaabot lamang ang go signal sa matag barangay kung naka preparar na kini sa uban pang panginahanglanon.

Ang Municipal Health Office nagpaabot ngadto sa mga kapitan nga padayong pahinumduman ang mga lumulupyo sa barangay nga manglimpyo sa panimalay ug tugkaran ug walaon ang mga posibleng puy-anan niini kay mao lang kini ang solusyon nga mapukan ang pagkanat sa mga virus nga dala sa lamok nga adunay dengue.

Si Mayor Hero usab miingon nga kini nga panghitabo dili lamang kini laban sa gobyerno batok sa mga lamok nga adunay dengue. Kini laban usab nato nga mga ordinaryong lumulupyo. Busa magkahiusa kita sa pagpanghinlo. Sabayang pagpanglimpyo iya gihangyo.