Mokabat sa 60 ka mag-uuma ug mangingisda ang mitambong sa Consultative Meeting nga gipahigayon niadtong Hunyo 10, 2026 sa Municipal Covered Court sa Barangay Sta. Cruz, San Jose, Dinagat Islands aron hisgutan ang ilang mga panginahanglan, mga hagit, ug mga programa nga makatabang sa pagpalambo sa ilang panginabuhian.

Mitambong usab sa maong kalihokan sila Municipal Mayor Ruben J “Kking” D. Zuniega ug Vice Mayor Rechard T. Pasquil isip pagpakita sa suporta sa lokal nga panggamhanan ngadto sa sektor sa agrikultura ug pangisda.

Gipangunahan ang consultative meeting nila MENRO MADAC Focal Person Loejun Patual, Municipal Agriculturist Jo Ann Gonzales, ug MTCAO Designate Paul Mark Bocota, diin gihisgutan ang mga prayoridad nga panginahanglan sa mga mag-uuma ug mangingisda ug ang mga inisyatiba nga mahimong ipatuman aron mapalig-on ang ilang sektor.

Pinaagi sa maong konsultasyon, gitinguha nga mapalig-on ang koordinasyon tali sa lokal nga panggamhanan ug sa mga mag-uuma ug mangingisda pinaagi sa pagpaminaw sa ilang mga kabalaka ug pagpalambo sa mga programa ug serbisyo nga motubag sa ilang mga panginahanglan.