Malampusong gipahigayon ang Uplift Program Pay-Out niadtong Agosto 11, 2026 sa Municipal Gymnasium, San Jose, Dinagat Islands, diin 581 ka benepisyaryo gikan sa nagkalain-laing barangay sa lungsod ang nakadawat sa gitakdang pinansyal nga tabang ubos sa maong programa.

Pinaagi sa Uplift Program, ang matag kwalipikadong benepisyaryo nakadawat og ₱2,000 matag bulan sulod sa unom (6) ka bulan isip suporta sa ilang mga panginahanglanon. Ang listahan sa mga benepisyaryo gibase sa 2024 Community-Based Monitoring System (CBMS) data gikan sa Philippine Statistics Authority (PSA).

Ang malampusong pagpatuman sa maong pay-out nahimo pinaagi sa koordinasyon ug panagtinabangay sa Municipal Social Welfare and Development Office (MSWDO) ug sa nagkalain-laing barangay sa lungsod. Pinaagi niini, napahibalo ang mga benepisyaryo ug natabangan sila sa pag-andam sa mga gikinahanglang dokumento ug identification alang sa pagdawat sa pinansyal nga tabang.

Ang Department of Social Welfare and Development (DSWD) maoy nanguna sa pagpahigayon sa pay-out, samtang ang MSWDO, uban sa suporta ug kooperasyon sa mga barangay, mitabang sa pagpahibalo ug pag-coordinate sa mga benepisyaryo. Ang PSA mitanyag usab og serbisyo alang sa PhilSys ID, nga usa sa mga gikinahanglang dokumento alang sa pagproseso sa ilang pinansyal nga tabang.

Nagpakita ang maong kalihokan sa maayong koordinasyon ug panagtinabangay tali sa mga ahensya sa gobyerno, lokal nga kagamhanan, mga barangay, ug komunidad aron masiguro ang hapsay nga pagpatuman ug paghatod sa mga programa ug serbisyo ngadto sa mga kwalipikadong benepisyaryo.