Malampusong gipahigayon sa Lokal nga Panggamhanan sa San Jose ang 52nd Nutrition Month Celebration niadtong Hulyo 31, 2026 sa Municipal Gym, Brgy. Don Ruben, nga naghiusa sa tanang 12 ka barangay sa munisipyo aron ipasiugda ang kahinungdanon sa husto nga nutrisyon ug himsog nga panginabuhi.

Ang selebrasyon, nga adunay temang “Sa PPAN, Sama-sama sa Nutrisyong Sapat Para sa Lahat” ug sub-theme nga “Nutrisyon at Kalikasan, Ating Pangalagaan,” gipangulohan sa Municipal Nutrition Committee uban sa suporta sa nagkadaiyang mga ahensya ug mga kaabag sa mga programa sa nutrisyon.

Kabahin sa maong kalihokan ang nagkadaiyang kompetisyon, lakip ang Cooking Contest, Table Display Contest, ug Poster and Slogan Making Contest. Pinaagi niini, gipakita sa mga partisipante ang ilang pagkamamugnaon ug kahibalo sa pag-andam og masustansiyang pagkaon, samtang gipalig-on ang kahibalo sa husto nga nutrisyon ug ang pagdasig sa himsog nga panginabuhi sa komunidad.

Sa iyang mensahe, gipasiugda ni Mayor Ruben J. D. Zuniega ang dakong papel sa husto nga nutrisyon sa pagpalambo sa kahimsog ug kaayohan sa matag pamilya. Giawhag usab niya ang padayon nga panaghiusa ug kooperasyon sa tanang sektor aron mas mapalig-on pa ang mga programa sa nutrisyon sa munisipyo.

Nagpasalamat ang Lokal nga Panggamhanan sa San Jose sa tanang 12 ka barangay, partner agencies, organizers, ug mga partisipante nga mitampo sa kalampusan sa maong selebrasyon. Nagpabiling lig-on ang komitment sa munisipyo sa pagpalambo sa husto nga nutrisyon ug himsog nga panginabuhi alang sa matag San Josenian.