Gipahigayon ang unang adlaw sa 5-Day DRR-CCA Mainstreamed Tourism Plan Formulation/Workshop niadtong May 4, 2026 sa E.Y. Suites, Surigao City, usa ka inisyatibo nga nagtinguha sa pagpalig-on sa kaluwasan, kalig-on, ug sustainability sa sektor sa turismo sa mga Local Government Units (LGUs).

Ang maong inisyatibo nagtinguha sa pag-integrate sa Disaster Risk Reduction (DRR) ug Climate Change Adaptation (CCA) sa mga plano ug estratehiya sa turismo sa LGU, aron mas mapalig-on ang kapasidad sa lokal nga gobyerno sa pag-andam, pagresponde, ug pagbangon gikan sa mga kalamidad ug epekto sa climate change.

Gipasiugda ni Mayor Ruben J “Kking” D. Zuniega sa iyang opening message ang kahinungdanon sa panaghiusa ug kolaborasyon aron mapalig-on ang sektor sa turismo ug mapataas ang kahandaan sa komunidad batok sa mga banta sa kinaiyahan.

Sa unang adlaw, gipahigayon ang mga sesyon nga nagtutok sa mga importanteng pundasyon sa tourism planning, lakip ang pagminus sa risgo sa kalamidad ug disaster preparedness, hustong pagplano ug pag-andam sa emerhensya, pagpanalipod sa kinaiyahan isip kritikal nga elemento sa turismo, ug pagpatuman sa malungtarong pamaagi sa pagpalambo sa mga destinasyon.

Gipasiugda sa lokal nga panggamhanan ang kahinungdanon sa kolaborasyon tali sa lokal nga gobyerno, stakeholders, ug komunidad aron masiguro nga ang turismo magpabilin nga aktibo, luwas, lig-on, ug andam sa bisan unsang kalamidad, ug responsable sa pag-atiman sa kinaiyahan.

Gipaambit usab ni Benlen D. Navas, MPA, Provincial Tourism and Culture Officer, ang kahimtang sa turismo karon pinaagi sa Tourism Trends: National, Regional, ug Provincial Tourism Situationer, nga naghatag og komprehensibong pagtan-aw sa kasamtangang dagan ug kalamboan sa sektor sa turismo.

Pinaagi sa hiniusang paningkamot, gilauman nga mas mapalig-on pa ang turismo nga makabenepisyo sa katawhan samtang nagmintinar sa kinaiyahan ug kaluwasan sa tanan.