Giorganisa ang maong programa sa Local Government Unit of San Jose, pinaagi sa Local Youth Development Office (LYDO), uban sa Department of Trade and Industry (DTI). Kini na ang ikatulong tuig sa pakigtambayayong sa LGU San Jose ug DTI alang sa pagpatuman sa Youth Entrepreneurship Program (YEP), nga nagpakita sa padayon nga paningkamot sa duha ka partner agencies sa pagpalambo sa entrepreneurial skills ug paghatag og mga oportunidad alang sa kabatan-onan.

Pinaagi sa maong programa, gihatagan ang mga kabatan-onan og kahibalo ug praktikal nga mga kahanas nga ilang magamit sa pagsugod, pagdumala, ug pagpalambo sa ilang kaugalingong negosyo. Lakip sa mga hilisgutan nga gitutokan ang business concepts, marketing, business operations, financial management, ug business pitching.

Isip culminating activity sa upat ka adlaw nga programa, gipahigayon ang Business Pitching Competition, diin gipresentar sa mga partisipante ang ilang mga konsepto sa negosyo atubangan sa panel of judges. Pinaagi sa ilang mga presentasyon, ilang napakita ang ilang pagkamamugnaon, kahibalo sa pagdumala sa negosyo, ug mga kahanas nga ilang nakuha atol sa seminar.

Nakuha ni Ken C. Durango ang unang pwesto pinaagi sa iyang business concept nga “Kenzone Printing Shop,” nga nagtanyag og printing services alang sa lokal nga mga kustomer.

Ikaduhang pwesto si Liza M. Palaca pinaagi sa “Upper Room Cafe and Wellness,” usa ka business concept nga naghiusa sa food and beverage services ug wellness experience.

Samtang, ikatulong pwesto si Jhessa Tolero Rabe pinaagi sa “J’s Coconut Iced Coffee,” usa ka beverage concept nga naggamit og lokal nga coconut products isip usa sa mga nag-unang sangkap niini.

Ang mga business ideas sa mga partisipante gisusi sa panel of judges nga gilangkuban nila Mr. Jumar H. Llorente (DTI-PDI), Ms. Nuela O. Paje (DOLE-PDI), Ms. Grace M. Villapando (PEDIPO), ug Ms. Mary Grace Pulido (DOST-PDI). Atol sa kompetisyon, ilang gihatagan og mga komento, suhestiyon, ug teknikal nga feedback ang matag presentasyon aron matabangan ang mga partisipante sa pagpalig-on ug pagpaayo sa ilang mga konsepto sa negosyo.

Sa kinatibuk-an, nahimong mahinungdanong oportunidad ang programa alang sa mga kabatan-onan sa San Jose aron mapalambo ang ilang kahibalo, kahanas, ug pagsalig sa pagnegosyo. Gilauman nga ang mga nakat-unan atol sa programa mahimong magamit nila sa pagpalambo sa ilang mga business ideas ug sa pagtukod og mas lig-on nga kaugmaon isip mga batan-ong negosyante.