Gipahigayon ang 2nd Quarter Meeting sa Municipal Tourism, Culture and Arts Council (MTCAC) niadtong Hulyo 24, 2026, sa SB Session Hall, Municipal Building, Sta. Cruz, San Jose, Dinagat Islands, diin gihisgutan ang mga updates, programa, ug umaabot nga mga kalihokan alang sa padayon nga pagpalambo sa turismo, kultura, ug arts sa munisipyo.

Atol sa maong miting, gipresentar ang mga update kabahin sa malampusong pagpahigayon sa Puyangi Festival 2026 (Fiesta Celebration). Gipasalamatan usab ang suporta ug aktibong partisipasyon sa nagkalain-laing sektor nga nakatampo sa kalampusan sa maong selebrasyon, samtang gihisgutan ang mga ideya ug mga lakang aron mapalig-on pa ang pagdumala ug organisasyon sa mga umaabot nga kalihokan sa munisipyo.

Gipresentar usab sa Tourism Office ang nagkalain-laing updates, lakip ang fiscal updates, Tourism Statistics Report, ug Accreditation Status sa mga tourism establishments ug operators sa munisipyo.

Lakip usab sa mga gihisgutan ang pagpangandam alang sa partisipasyon sa San Jose sa umaabot nga Bugkosan sa Isla Festival 2026. Gihatagan og pagtagad ang mga kinahanglanong pagpangandam ug koordinasyon aron masiguro ang maayong representasyon sa munisipyo isip kabahin sa maong provincial activity.

Pinaagi sa maong tigum, napalig-on ang koordinasyon ug panaghiusa sa nagkalain-laing sektor sa pagplano ug pagpatuman sa mga programa ug kalihokan nga nagtumong sa pagpalambo sa turismo ug kultura, ingon man sa pagpasundayag sa mga garbo ug potensyal sa San Jose.